KUCHING: Langgur penemu meri penuduk nyadi Sapit Menteri Besai (TPM) ungkup Sarawak enggau Sabah nya baka ti ukai ari ati ti rurus.
Siku penganalisis politik, Profesor Bidang Politik Universiti Putra Malaysia (UPM), Prof. Datuk Dr. Jayum Jawan bepenemu langgur nya endang patut ari suba laban Sarawak enggau Sabah sama enggau Malaya numbuhka Malaysia.
Tang langgur penemu tu dibantai maya pengawa bepilih diatu, ku iya seraya madah ngayanka diri udah enda tegap ba Pengawa Bepilih Besai Ke-15 (PRU15).
“Tanda tauka kelai kereja orang ke nemu diri alah dalam pengawa bepilih. Enti dalam jaku orang ribai ‘- It is an act of a desperate man- ‘.
“Tu ukai langgur penemu enggau ati ti rurus. Enti amat manah baka tu, nama kebuah baru diatu besemaya? Lapa enda lama suba laban Tanah Melayu, Sabah enggau Sarawak sama numbuhka Malaysia.
“Endang patut (Sapit Menteri Besai diungkup ngagai Sarawak enggau Sabah) tang udah kelalu laun,” ku iya lebuh dirandau Utusan Borneo.
Felo, Akademik Sains Malaysia tu meri penerang nya lebuh ditanya bekaul enggau Barisan Nasional (BN) ti meri langgur penemu meri penuduk nyadi Sapit Menteri Besai ungkup Sabah enggau Sarawak enti menang ba PRU15.
Kena Hari Minggu (23 Oktober 2022) Chairman BN Datuk Seri Dr Ahmad Zahid Hamidi maya aum media di Kimanis,Sabah, madahka tiga pangku pengawa nyadi Sapit Menteri Besai deka ditumbuhka kena ngarika Sarawak, Sabah enggau Semenanjung Malaysia enti BN menang maya PRU15.
Sebedau tu, Premier Sarawak ti mega Chairman Gabungan Parti Sarawak (GPS), Datuk Patinggi Tan Sri Abang Johari Tun Openg kala madah numbuhka pangku pengawa Sapit Menteri Besai ungkup Sarawak mesti disempulang enggau jamin kuasa, ukai semina gawa nyadi ‘ketuai tokoh’ dalam kabinet.
Sekretari Besai GPS, Dato Sri Alexander Nanta Linggi kala ngenang pekara ti sama bepenemu madahka pangku pengawa Sapit Menteri Besai nya patut disempulang enggau portfolio menteri ke pemadu beguna kena nentuka pengasi pengawa dikereja.