Sida patut betemu enggau berandau enggau peranak ti dipegai dalam nentuka pemansang genturung pendiau
“Nengah pengawa berandau ti diatur tu, nya deka ngemuntangka agi semua proses ngelangkar pemansang ti dieka dipejalaika di sitak diri empu,”
Datuk Francis Harden Hollis
Sapit Menteri Pelajar, Inovasyen enggau Pemansng Pengelandik
SRI AMAN: Sapit Menteri Pelajar, Inovasyen enggau Pemansng Pengelandik Datuk Francis Harden Hollis ngelalau tetiap ketuai komuniti ditu ngambika terus bejalaika tanggungpengawa dalam ngemansangka genturung pendiau sereta rumah panjai diri.
Ku iya madah, ketuai komuniti patut datai kediri empu begulai enggau ketuai nengeri, kelimpah suah agi ntaur pengawa berandau enggau komuniti dalam kandang menua diri.
“Nengah pengawa berandau ti diatur tu, nya deka ngemuntangka agi semua proses ngelangkar pemansang ti dieka dipejalaika di sitak diri empu,” ku iya.
Iya madah munyi nya lebuh ti bejaku maya bejadi Tumah Komiti Pemansang enggau Pengelikun Genturung Pendiau (JKKK) Rumah Ayai, Kampung Putat ditu, bedau lama ti udah.
Iya ti mega Kaban Kunsil Nengeri (ADUN) Simanggang madah, nengah pengawa berandau begulai tu semua penerang bekaul enggau pemansang sereta penanggul ti ditapi di rumah panjai deka ulih ditemu.
Ku iya agi, bala ketuai patut sesingkang enggau polisi perintah dalam nentuka tetiap langkar pemansang perintah bulih kerejasama lalu mujur.
“Kitai enggai, perambu manah perintah dalam sebuah rumah panjai tu tejanggal tuaka diambi pulai ketegal nadai bulih pemendar ari peranak rumah panjai tauka rayat nyentukka ulih ngerugika komuniti dalam timpuh ti lama,” ku iya.
Harden mega minta ngambika tetiap JKKK enggau Biro Orang Indu meri penerang bekaul enggau aktiviti ti dipejalaika lalu enggau pun pemisi agih belanja sereta bakani nya dipelanjaka.
“Aku suah ngelalau iya nya tetiap pengawa ngintu gerempung JKK ti manah iya nya bisi guna komiti besai dalam nyendiaka profil genturung pendiau, ngembuan aktiviti ninting taun ti dilangkar enggau manah, ngemaruka sistem ripot, meri penerang ngagai peranak ari baruh pegai gempung JKKK bekaul enggau mayuh macham pekara nyengkaum pun pemisi agih belanja,” ku iya.
Dulu agi ari nya, rumah JKKK ti udah tembu digaga kena taun nyin kemari enggau ungkus RM25,000 iya nya ari agih belanja ti diberi Harden lalu udah digaga nengah chara beripai ari JKKK sereta Biro Orang Indu Rumah Ayai, Kampung Putat.
Rumah JKKK tu udah meri pemaik ngagai gempung sereta biru tu ti nyadika palan dikena bejalaika aktiviti sereta ngembuan tuju dikena nyimpan kereban ti diguna gerempung.
Ba pengerami tu, Harden udah nyuaka geran ngagai empat JKKK sereta dua Biro Orang Indu enggau agih belanja sepenyampau RM39,000.
Bala sida ti nerima iya nya JKKK Rumah Robert, Nanga Pruan, JKKK Rumah Charli Ata, Pruan A, JKKK Rumah Ipan, Pruan B, JKKK Rumah Ayai, Kampung Putat, Biro Orang Indu Rumah Charli, Pruan A sereta Biro Orang Indu Rumah Ayai, Kampung Putat.