KUCHING: Chalun Gabungan Parti Sarawak (GPS) ba kerusi Parlimen Puncak Borneo agi nyadi entelah.
Mandal Presiden Parti Pesaka Bumiputera Bersatu (PBB) Datuk Roland Sagah madah, iya enda nemu sekalika penyandang kerusi nya, Datuk Willie Mongin bisi dalam rintai nama chalun ti dilanggur ngarika GPS maya Pengawa Bepilih Besai Ke-15 (PRU15).
Ku Sagah, iya nadai ninga sebarang berita ti madahka Willie ke diterima sechara rasmi nyadi kaban PBB kena 6 Ogos 2022, dichalunka GPS di Puncak Borneo.
Taja pia, nya bepanggai ba Premier ke mega Chairman GPS, Datuk Patinggi Tan Sri Abang Johari Tun Openg untuk ngaga pemutus ti pemadu manah ungkup GPS sereta mantaika nama chalun ke dipilih enti udah datai ba maya iya ila.
"Rintai (nama chalun). Aku enda nemu.Aku nadai (rintai nama chalun). Asai aku manah agi kita (media) nanya Premier sekalika iya bisi rintai (nama chalun) tauka nadai,"ku iya.
Iya madah munyi nya pengudah ngarika Premier Sarawak Datuk Patinggi Tan Sri Abang Johari Tun Openg bejadi Aum Antarabansa Sains Inovatif dan Teknologi Untuk Penyelidikan dan Pendidikan (InnoSTRE) 2022 ba Palan Konvensyen Borneo Kuching (BCCK) ditu, kemari.
Sagah ke mega Menteri Pelajar, Inovasyen enggau Pemansang Pengelandik madah, iya enda ulih ngaga tauka meri sebarang langgur penemu ungkup sapa bagi chalun Puncak Borneo.
Iya mega enggai nyaut lebuh ke ditanya bekaul enggau randau ti benung angat ti madahka Willie siku chalun 'ti pemadu ulih menang' ba sitak nya.
"Sesapa aja ulih menang," saut iya pandak.
Willie menang ba kerusi Puncak Borneo maya PRU14 (2018) lebuh iya bediri minta pilih nyadi chalun Parti Keadilan Rakyat (PKR) enggau majoriti 4,005 undi nyatup Jennoth Sinel ari PBB ngarika Barisan Nasional (BN) maya nya.
Taja pia, Willie ningkilka diri ari PKR dalam taun 2020 berindik ari 'Langkah Sheraton' ti ngujungka perintah Perikatan Nasional (PN) ditumbuhka, lalu iya dichiri nyadi Sapit Menteri Industri Ladang enggau Komoditi.
Kena 6 Ogos 2022, Willie diterima nyemilik PBB ti ngujungka sitak Puncak Borneo diempu GPS baru.
Puncak Borneo siti ari tiga kerusi Parlimen majoriti Bidayuh kelimpah ari Mas Gading enggau Serian.
"GPS udah sedia sereta enda surut enda ngira sapa bagi ke disatup ba ketetiga kerusi nya," ku iya.
Ditanya pasal Parti Tindakan Demokratik (DAP), ti madahka penyandang Mordi Bimol deka dichalunka baru ngenanka sitak Mas Gading lalu Learry Jabul dilengkah di Serian, Sagah madahka Malaysia menua ti ngemeranka sistem demokratik, sesapa aja tau bediri minta pilih ba dini – dini endur maya pengawa bepilih.
"Kami dalam GPS deka ngelaban sida. Kami deka mandangka kami parti ti manah agi, parti ti meri komitmen penuh mantu rakyat lalu ukai semina retorik tauka maya pengawa bepilih.
"Ya, kami (GPS) udah bisi chalun ba ketetiga kerusi majoriti Bidayuh (tang) kami nyerahka nya ba Premier mantaika nya," pia ku Kaban Kunsil Negeri (ADUN) Tarat nya.