Diatu nadai mayuh pengawa nulis bekaul enggau budaya, tradisyen enggau penyulut raban bansa Dayak
"Kitai bisi mayuh orang pichin ari gawa opis perintah nyengkaum pengajar, pakar budaya enggau ke bukai. Sida ke deka nyadi penulis tau betanya ngagai DCF bekaul enggau bantu ngemansutka bup ke ditulis”
Datuk Amar Douglas Uggah Embas
Chairman DCF
KUCHING: Yayasan Kebudayaan Dayak (DCF) sedia mantu penulis Dayak ke deka nempa penyulut tauka pemujur ba pengawa nulis.
Chairman DCF, Datuk Amar Douglas Uggah Embas madahka diatu nadai mayuh pengawa nulis bekaul enggau budaya, tradisyen enggau penyulut raban bansa Dayak.
"Kitai bisi mayuh orang pichin ari gawa opis perintah nyengkaum pengajar, pakar budaya enggau ke bukai. Sida ke deka nyadi penulis tau betanya ngagai DCF bekaul enggau bantu ngemansutka bup ke ditulis.
"DCF deka ngetanka sepemayuh ke ulih budaya enggau tradisi kitai ungkup rebak biak," ku iya lebuh bejadi (bup) autobiografi siku pengajar Iban, niang Athelstance Alli Majang ditu, kemari.
Buku ti bisi 286 lambar nya ditulis anak niang, Datu Michael Dawi Alli ti mega Ketuai Pengerejista Kort Bumiputera Sarawak.
Kelimpah ari nya, Uggah ti mega Sapit Premier Sarawak meri basa ngagai niang Alli ti dianggap nyadi pengemun ba raban pengajar keterubah Dayak.
"Iya gawa ari baruh pegai perintah Jepun, British lalu kepenudi endar iya nya Perintah Malaysia.
"Nyadi siku pengajar ke dilatih sereta udah nya nyadi 'Penyelia Kumpulan Sekolah' nyentuk ke pinchin dalam taun 1978 di Bagi Menua ketiga, iya meda pekara pelajar beguna amat ngagai rebak baru di menua pesisir.
"Iya betapi enggau apai indai ti enda bekunsi visyen, aspirasyen sereta ujuluk ati enggau iya.....Proses pelajar siti pekara ti nyelai ba sida.
"Taja pia Alli mujur meri pengarap ngagai sida lalu iya arap amat ati ulih ngereja nya," ku Uggah.
Iya bejaku baru," Ba endur ti nadai sekula, iya bejalaika pengawa ke pemadu beguna mantu numbuhka sekula sereta ngumbuk apai indai nganjung anak ke sekula."
Uggah madahka pekara ti didegi enggau komitmen Alli patut dichunto raban pengajar enggau apai indai.
Nitihku iya, dulu suba, anak di menua pesisir betap i enggau siti pemar ke chukup besai maya deka ngulihka pelajar.
"Tebal agi ari kami nya bedarat jauh ke sekula. Kami mega, bisi maya iya meri seberekas kayu api kena mantu berapi ba dapur sekula," ku iya.
Uggah madah, berindik ari bantu besai ari iya, niang Alli dipilih nyadi "Tokoh Guru Sarawak" dalam taun1984 lalu ba taun nangkan nya diangkatka nyadi "Tokoh Guru Kebangsaan".
Dulu ari, nya Michael lebuh bejaku madahka edit bup ti ditulis niang apai iya nyadi siti pemar ba iya.
Ketegal nadai pelajar formal dalam jaku Iban, iya enggai nyadi enda minta bantu ari pakar jaku Iban baka Harold Unsie enggau Dr Evelyn Batik.
Michael madahka niang apai iya mega siku penulis ti prolifik enggau entara sida ke bukai, udah nganjung artikel ngagai majalah "Nendak" Iban ke diatu enda dikena agi sereta dichelak agi.
Iya mega bisi pesan ti negu ati iya nya 'Pengerurus ati iya rega ti pemadu besai reti ke patut dikemeranka semua orang'.
"ku iya agi 'orang ti rurus ati deka bisi pengidup ti chukup sereta mayuh pangan", ku Michael.