Anda di sini

PRU15: 5 November ngantung nama,19 November ngundi

Advertisement
 

PRU15 tu diatur sereta enggau DUN beberapa buah negeri ti udah direrak nyengkaum PRK DUN N.66 Bugaya, Sabah

“Timpuh bekimpin ditetapka 14 hari, berengkah pengudah ngantung nama chalun kena 5 November 2022 nyentuk pukul 11.59 malam, 18 November 2022” 

Tan Sri Abdul Ghani Salleh 
Chairman SPR

KUCHING: Opis Pengawa Bepilih Malaysia (SPR) netapka 19 November 2022 tu Hari Ngundi ungkup Pengawa Bepilih Besai Ke-15 (PRU15).

Pekara nya dibantaika Chairman SPR Tan Sri Abdul Ghani Salleh maya aum pengarang berita, pengudah nyadi chairman aum khas SPR bekaul enggau pengawa bepilih nya di Putrajaya kemari.

“Hari ngantung nama chalun ditetapka kena 5 November 2022 lalu hari undi tumu kena 15 November 2022.

“Timpuh bekimpin ditetapka 14 hari, berengkah pengudah ngantung nama chalun kena 5 November 2022 nyentuk pukul 11.59 malam, 18 November 2022,” ku iya madah maya aum pengarang berita nya.

PRU15 ti diatur deka mungkur semua 222 sitak renggat Parlimen di serata menua, lalu negeri ti udah ngererak Kunsil Negeri iya nya Perak, Pahang enggau Perlis. Dalam timpuh ti sama, PRK DUN N.66 Bugaya, Sabah mega diatur sereta dikena ngisi sitak nya ke udah puang.

Nambah nya iya madah, peminta semua kategori undi pos luar menua enggau dalam menua udah dibuka berengkah 10 Oktober 2022 ungkup PRU15, enggau ari 13 Oktober 2022 ungkup PRK DUN N.66 Bugaya, Sabah.

Peminta undi pos ungkup kategori 18 (peranak menua Malaysia ke diau di menua tasik) enggau Kategori 1C Ejensi tauka Organisasyen) digaga nengah chara online.

Kena bejalaika proses PRU15 enggau PRK DUN N.66 Sabah, SPR udah nyiri 222 iku Pemesai Pengatur Pengawa Bepilih ti  dibantu 1,264 iku Penulung Pengatur Pengawa Bepilih.

Bejalaika pengawa matau aktiviti kimpin sekumbang timpuh bekimpin, SPR deka numbuhka 625 Tim Neritka Adat KimpIn Pengawa Bepilih (PP-KPR) ti dipasuk raban Polis Diraja Malaysia, Opis Bekuasa Kandang Menua (PBT) enggau pengari chalun ke minta pilih.

Maya PRU15 enggau PRK DUN N.66 Sabah, bisi 222 Palan Ngantung Nama Chalun (PPC) enggau 222 Palan Ngitung Rasmi Undi (PPRU) deka dikena.

Bisi 363,515 iku pengereja pengawa deka dichiri bejalaika proses PRU15 enggau PRK DUN N.66, Sabah.

Bisi 8,985 buah palan ngundi ke bisi 38,348 nyendiaka lurung alai ngundi enggau 578 palan ngundi tumu ti bisi 970 lurung alai undi  tumu deka dikena. Semua penyampau palan ngundi iya nya bisi 9,536 buah ti mungkur 39,318 lurung alai ngundi.

PRU15 enggau PRK DUN N.66, Sabah tu dianggarka begunaka belanja sepenyampau RM1.01 bilion.

Rejista Pemilih Pengawa Bepilih (DPPR) ti deka dikena ungkup PRU15 enggau PRK DUN N.66 Bugaya Sabah, iya nya register pengundi ti pemadu baru iya nya nyentuk  Rejista Pemilih Tambah Bulan Ogos 2022 ti dikemaru nyentuk 9 Oktober 2022.

“DPPR ungkup PRU15 ti bisi 21,173,638 iku pengundi  nyengkaum 20,905,366 iku pengundi, 146,737 iku soldadu enggau bini/laki, 118,794 iku polis sereta bini/laki Polis Pasukan Gerakan Am (PGA) enggau 2,741 iku pengundi enda nurun ngundi ari luar tasik,” ku iya.

Pengundi tau meresa penerang pasal palan ngundi, lurung alai ngundi enggau lumur penyampau sida nengah portal  https://mysprsemak.spr.gov.my  tauka telefon ngagai hotline SPR ba lumur 03-88927018 / 03-88880040 tauka nengah aplikasyen MySPR Semak. Penerang tu tau diperesa berengkah ari 31 Oktober 2022.
 

Advertisement