SIBU: Parti ti numbuhka perintah pengudah ke menang ba Pengawa Bepilih Besai Ke-15 ila, mesti beratka isu bedau nyadi peranak menua di Sarawak, pia ku Chambai Lindong.
Chairman Gerempung Bansa Dayak (SDNU) Pampang Sibu nya madahka isu nya mesti diputar ambika sesapa ti bedau bisi dokumen nya diberi nyadi peranak menua enti sida tetangkupka peminta ti patut.
Ku iya, isu bedau nyadi peranak menua tu mengkang siti isu di Sarawak di menua pesisir, kelebih agi ba raban bansa Dayak.
"Nya engka berindik ari kurang penemu pasal pemesai guna bisi dokumen pengelala diri nya.
"Suba, nya nyadi ketegal rumah panjai jauh ari opis pengerejista bansa di mengeri.
"Tang diatu, nya nyadi ketegal apai indai enda beratka pengidup bala anak ungkup jemah ila. Ambika chunto, ba siti siti kes ti diputarka aku diatu, anak nya enda dikeibuhka pengudah apai enggau indai iya sarak.
"Apai indai mih ke patut ngerejista anak sida tang apai iya enda kiruhka pasal pekara nya. Indai iya enda ngerejista anak nya laban iya empu pan nadai dokumen pengelala diri," ku iya.
Ku Chambai, mayuh pengurang enti sesiku nya nadai dokumen pengelala diri.
"Sida deka napi pemar ngena fasiliti perintah baka ba pekara pengerai enggau pelajar ti disediaka perintah," ku iya.
Chambai ke mega siku luyar madahka polisi ti dikena perintah negeri iya nya ngeluarka dokumen sementara ba individu ti bedau nyadi peranak menua (DSITK) ti baruh ari umur 21 taun di Sarawak.
Pom peminta kena minta dokumen nya diberi nama ‘Dokumen Sementara Individu Tanpa Kewarganegaraan’ (DSITK) ti tau diambi ba semua opis pelilih menua di negeri tu berengkah ari bulan baru.
Menteri Orang Indu, Nembiak Mit enggau Pengelantang Pendiau Raban Bansa, Dato Sri Fatimah madahka DSITK nya tau dikena dalam timpuh tiga taun.
Ku Chambai enti bisi DSITK, orang ke bisi nya ulih berubat enggau belajar ba fasiliti perintah taja pan nya ukai nyadika jamin sida diberi nyadi peranak menua Malaysia.
"Bisi mega siti kes ke alai siku nembiak lelaki kena penusah bebadi apin lama udah, ke alai siti paku nanchum kening iya.
"Iya ke sepital lalu dipinta bebayar nitihka penyampau bayar orang ari menua luar laban iya nadai dokumen pengelala diri nyadi peranak menua Malaysia.
"Tang iya nadai duit kena mayar nya. Nasit amat, tuai rumah panjai sida mantu lalu udah nya ke Kuching minta dokumen pengelala diri nembiak lelaki nya.
"Pengujung iya, nembiak lelaki nya dipinta mayar sebaka penyampau enggau peranak menua Malaysia ke bukai," ku iya.
Iya mega minta pengari rayat ti dipilih maya pengawa bepilih tu ila, mai pekara tu ngagai perintah besai.
"Ngarapka perintah besai ulih nyaup pengawa ti dipejalaika perintah Sarawak ba sentang isu tu.
"Aku rapa amat ati enti sesiku nya udah diberi DSITK, singkang pejalai iya ngulihka diri nyadi peranak menua, udah datai setengah jalai. Aku mega pechaya, DSITK nya mai reti perintah negeri nemu orang ke megai nya peranak negeri Sarawak.
"Prosedur minta setipik lain ngerejista pengada enggau MyKad bebida enggau DSITK,tang nya ulih nyukung sida lebuh ke ngaga peminta," ku iya.