Nya tau ngengkahka Malaysia nyadi sebuah menua ti ngembuan pengelebih enti dibanding enggau ke bukai
"Ari taun 2009-2012, Malaysia ba penuduk kesemilan dalam rintai '10 Penatai Temuai Ke Pemadu Mayuh di Dunya'”
Dato Sri Nancy Shukri
Menteri Dagang Temuai, Seni enggau Main Asal
KUCHING: Raban nembiak ti bisi kaul enggau sektor dagang temuai diperansang betan seraya nyerungkai 'permata ti enda dipeda' baru ditu, pia Menteri Dagang Temuai, Seni enggau Main Asal, Dato Sri Nancy Shukri.
Ku iya, nengah pemisi potensial ti bedau diserungkai nya, tau ngengkahka Malaysia nyadi sebuah menua ti ngembuan pengelebih sereta ulih besemekih enti dibanding enggau ke bukai.
"Ari taun 2009-2012, Malaysia ba penuduk kesemilan dalam rintai '10 Penatai Temuai Ke Pemadu Mayuh di Dunya'.
"Taja pia, industri dagang temuai udu kompetitif lalu semua menua bukai udah belajarka strategi enggau chara kitai ngelaku ti ngujungka penuduk Malaysia nurun ngagai penuduk lumur 22 diatu.
"Nya kebuah, kitai semua mesti bekerejasama sereta bisi inovatif maya mantaika idea baru ti lebih dinamik, setipak enggau peneka sereta guna ke diatu,dikena matak mayuh agi temuai antarabansa datai ke Malaysia," ku iya.
Nancy bejaku munyi nya maua Pengerami Nembiak Dalam Dagang Temuai (YIT) ti diatur ba sebuah hotel ditu, pagi kemari.
Nya alai ku iya, Malaysia udah berengkah ngangkatka industri dalam menua nyadi dagang temuai ti meri asil ke besai agi sereta ngenan utai asal.
Iya mega ngelalau pengemeran industri ambika nemu nusui jerita tauka nengkebang isi jaku dikena ngelakuka produk dagang temuai.
Enti kitai mandingka menua kitai enggau menua Thailand, Singapura, Indonesia tauka Vietnam, kitai kebendar iya mayuh agi palan ti manah sereta tau ditapat bala temuai.
Pengemeran industri mega patut ngena teknologi ti baru diatu, kompleks sereta jampat nukar dunya kitai diatu.
"Ambika banding, kitai mesti belajarka 'pengoptimuman enjin carian' (SEO), algoritma ba media sosial kena ngulihka pemutus ke pemadu manah.
"Reti nya, kitai mesti 'viral' Sarawak enggau Malaysia n gena pekara ti positif ambika dikelala dunya," ku iya.