KUCHING: Parti Demokratik Progresif (PDP) tetap deka ngenanka kerusi Parlimen Saratok lalu pengawa berebutka kerusi nya enda patut nyadi.
Ketuai Nembiak PDP, David Yeo nyemetak madahka pekara itu laban kerusi Saratok endang enggi parti nya, lalu chalun PDP udah ditetapka ketuai Gabungan Parti Sarawak (GPS) deka ngenanka sitak parlimen nya.
"Sebeldau tu, PDP kala mai Datuk Ali Biju nyemilik PDP sereta bediri mminta pilih ba kerusi Saratok nengah GPS, tang iya enggai.
"Laban ngelama tu PDP bediri minta pilih ba kerusi Saratok, sekalika Ali Biju ari Parti Pribumi Bersatu Malaysia (BERSATU) deka bediri minta pilih tauka enda, enda ulih dikeenggaika chalun PDP ti ditetapka GPS deka ngenanka kerusi nya," ku iya madah nyemetak nengah penerang berita, kemari.
Yeo bejaku munyi nya nimbal penerang ari Ketuai Nembiak BERSATU Sarawak Alexander Frusis ti dipansutka bedau lama udah, ti meri langgur penemu ambika PDP anang ngengkah chalun di Saratok maya Pengawa Bepilih Besai Ke-15 (PRU15) tu ila, tang meri peluang ngagai Ali Biju ke mega penyandang kerusi nya.
Ku Yeo, leka jaku 'nyerahka' kerusi tauka meri peluang ngagai sesapa endang nadai jalai, laban Kaunsil Tetinggi GPS ari suba endang nyukung kimpin PDP ba (sitaknegeri) Krian.
Ku iya baru, PDP semina berandau enggau Ali Biju kena ngulihka sukung nyengkaum mai iya nyemilik PDP ambika iya tau gawaka rayat Sarawak dudi ila.
"Sayau amat laban pengudah Ali Biju udah lama berandau enggau parti kami, penuduka iya majak enda tegap.
"Aemina bedau lama udah, Ali Biju udah 'muka mata' lalu deka berandau baru enggau kami pasal pekara tu. Taja pia, baka ke ditemu kitai, mayuh pengawa kena tumu nyikap diri nyerumba pengawa bepilih besai tu.
"Laban parti enda uli meri saut ba maya ke udah sempil, PDP nadai pilih bukai kelimpah ari meri langgur penemu ngagai Premier Sarawak, Datuk Patinggi Tan Sri Abang Johari Abang Tun Openg sereta nganjung nama Giendam Jonathan nyadi chalun ke bisi potensial di Saratok," ku iya.
Nya alai ku Yeo, ukai mudah nukar tauka ngubah pekara nya laban nya ukai baka main nembi ak mit ti deka sepeneka ati ngubah, laban nya tau nempa penyarut ba renggat nembiak redak.
“Neruska pengidup tu disema baka bemain dam. Sekeda siri kereja alternatif ungkup PDP udah diatur enggau chara ke besai.
"Enti BERSATU keran deka enggau 'belaban' ba barang bagi sitak Parlimen ti diempu PDP, kami deka enggau naka u lih ngenanka nya.
"Kami mulaika kuasa ngagai pengundi ambika ngaga pemutus ke betul" ku Yeo madah nyemetak.