SELANGAU: Ketuai Pampang Parti Pesaka Bumiputera Bersatu (PBB) Tamin, Meyu @ Mew Bruang nyakal penemu sekeda orang ti madahka pampang iya nya ‘penyakal’.
Ku iya, tu berindik ari pengawa ti dipejalaika pampang iya ngelama tu ti ngambi kaban baru nyadi kaban PBB.
"Kami ngambi kaban ke nadai parti lalu ukai mai kaban parti komponen Gabungan Parti Sarawak (GPS) ti udah bisi parti kediri empu nyemilik PBB.
"Ngelama tu, kami nadai 'ngerampas” kaban parti komponen bukai tang ngambi sida ti nadai parti tauka ari parti penyakal," ku iya.
Meyu madah munyi nya lebuh ke bejaku bejadi dua ranting baru pampang nya, iya nya PBB Ranting Sungai Melinau Selangau enggau PBB Ranting Dijih Tamin ba Bilik Operasyen PBB Selangau ditu, kena Hari Enam minggu nyin tadi.
Sama bisi ngulu pengerami nya, Sekretari Pampang PBB Tamin Henry Tukang, Ketuai Orang Indu Pampang PBB Tamin, Dami Dingon enggau Tukang Wang PBB Tamin, Tuai Rumah Rantai Aluk.
Ku Meyu, pampang iya mega bejalaika program ngambi kaban ari parti penyakal ambika nikal ngagai PBB dikena ngeringka sukung ngagai parti komponen GPS.
“Pengawa kami ti iya nya 'ngurangka' kaban parti penyakal ba sitak Kunsil Negeri (DUN) Tamin, enti ulih kami deka ngelengiska penyakal ba Parlimen Selangau ambika chalun GPS tau menang darat maya PRU15 ila," ku iya.
Berebak enggau nya, Meyu meri jamin ke alai pampang iya meri sukung penuh ngagai sesapa aja chalun GPS ti bediri minta pilih ba kerusi Parlimen Selangau maya PRU15.
"Kami deka besaup mantu ambika chalun GPS ti bediri minta pilih ba Parlimen Selangau pada PRU15 menang,” ku iya.
Iya ngarapka chalun ke bediri minta pilih ngarika GPS ila, ulih mantu rayat Selangau sereta enda bepilih bulu sereta semampai enda besiping gawa ke rayat.
Ngenang pasal pengawa bejadi ranting bangawa milih sereta bejadi ranting baru nya endang dikena ngerembaika pampang PBB di DUN Tamin.
"Kelimpah ari nya, nya mega ngemudahka pengawa ngambi kaban baru ba kandang menua sida.
"Nengah pengawa numbuhka kededua ranting nya, semua kaban PBB berasai chukup gaga ati laban sida udah bisi ranting PBB kediri empu laban sida mega udah chukup penyampau kaban kena muka ranting," ku iya.
Maya pengawa bejadi kededua ranting baru nya, Nyawin Judi enggau Rubaidi Rosli menang darat lalu mangku pengawa nyadi Ketuai Ranting Dijih Tamin enggau Ketuai Ranting Sungai Melinau Selangau.
Bisi 150 orang kaban baru ari kededua ranting nya nyadi kaban PBB.
Enggau penambaha kaban ari dua ranting baru nya, nya mega lalu nambahka penyampau kaban dalam Pampang PBB Tamin nyengkaum nambahka ranting baru dalam Pampang PBB Tamin.
Naka ke diatu, lebih 4,000 iku kaban PBB di DUN Tamin berindik ari penambah ranting baru nya dalam Pampang PBB Tamin.