Pengawa mutarka trafik di mengeri ti sistematik endang patut amat kena nentuka pejalai likun, teratur sereta sikar
“SUTMAC deka beratika sekeda isu trafik enggau chara begulai lalu sama meri langgur penemu ngagai perintah program sereta sama singkang,nengah projek enggau inisiatif dikena mutarka isu nengah chara ti lebih teatur”
Dato Sri Lee Kim Shin
Menteri Perengka Pengangkut Sarawak
KUCHING: Komiti Mutarka Trafik Mengeri Sarawak (SUTMAC) deka nyadi forum ngagai semua orang ke bisi pemerat sereta begelumu mutarka sekeda isu ke berat ti tau ngeruga pejalai trafik di mengeri enggau pejalai perengka pengangkut.
Menteri Perengka Pengangkut Sarawak Dato Sri Lee Kim Shin madah,mutarka trafik di mengeri ti sistematik endang patut amat kena nentuka pejalai likun, teratur sereta sikar ungkup mensia enggau barang, kelimpah ari nyaga rampa menua.
“SUTMAC deka beratika sekeda isu trafik enggau chara begulai lalu sama meri langgur penemu ngagai perintah program sereta sama singkang,nengah projek enggau inisiatif dikena mutarka isu nengah chara ti lebih teatur.
“SUTMAC ditumbuhka endang ngena ba maya iya awak bejalaika pengawa Opis Menteri Perengka Pengangkut kena mutarka trafik di mengeri,” ku iya madah nengah penerang berita, kemari.
Ku iya baru, mayuh mengeri besai balat dikemansangka lalu palan berumah ditambah nyauka ba tetiap endur dalam kandang mengeri.
“Tu ngujungka penyekut nyadi laban semina mimit aja awak alai perengka pengangkut mindah ti enda tepekul ba jalai tauka simpang nadai api trafik.
“Nya alai, beratika senario perengka pengangkut darat kemaya hari tu, kami udah ngerembaika infrastruktur jalai alun ti nyambung ke pasar, pasar mit enggau genturung pendiau di serata negeri. Pemanjai jalai udah nambah ari 13,231 kilometer (km) dalam taun 2006 ngagai 305,528 km dalam 2019,” ku iya.
Ku Lee baru, enggau mayuh penambah kerita, mutosikal enggau perengka pengangkut komersial, penyampau trafik sdiatu udah manggai ba magnitud ti tau ngeruga pengelikun ba jalai alun.
Ku Lee, Sarawak bisi ejensi negeri enggau Perintah besai ti diberi tanggungpengawa enggau kuasa kena nyaga pejalai trafik enggau ngaga infrastruktur jalai (street furniture) ungkup trafik.
Ejensi tu ku iya, bekereja nitihka portfolio,pengawa sida kekadang bisi agenda denggau pekara ti dikemeratka sida empu.
Opis Menteri Perengka Pengangkut Sarawak udah ngatur aum SUTMAC ti keterubah kena 26 September ti tadi bechairmanka Lee.
Aum nya digulu Ketuai Opis, Pemesai Perintah ari Opis Menteri engagu Indu Ejensi enggau orang ke bekaul ti megai tanggungpengawa ngaduka trafik di mengeri nyangkaum Residen semua bagi menua di Sarawak.
SUTMAC ti ditumbuh dikemendarka Kabinet Sarawak kena 25 Ogos taun tu tadi lalu aum SUTMAC diatur enda kurang ari dua kali setaun.
Komiti ti ditumbuh endang setipak enggau siti ari batang pengawa Opis Menteri Perengka Pengangkut Sarawak baka ti ditetapka ari baruh Sarawak Government Gazette Notification, jld. LXXVII kena 21 Januari 2022.