Anda di sini

PBDS dikemendarka ngena nama asal, semengat baru kena negika Agenda Dayak 

Advertisement
(Ari kiba) Sawing, Bobby enggau Allex, mandangka surat pemendar ari ROS nama PBDS,address enggau ngemendarka ngenamenira sereta lambang parti nya.
(Ari kiba) Sawing, Bobby enggau Allex, mandangka surat pemendar ari ROS nama PBDS,address enggau ngemendarka ngenamenira sereta lambang parti nya.

MIRI: Parti Bansa Dayak Sarawak (PBDS) diatu udah ngena  nama asal pengudah Opis Ngerejista Gerempung (ROS) ngemendarka nama nya ditukar sereta ningkilka 'Baru' di belakang nama parti nya sebedau tu, sah kena 30 Ogos tu tadi. 

Presiden parti nya, Bobby William dalam aum media ditu kemari madah, ROS mega udah ngemendarka address indu opis baru ba Bandar Baru Sibu Jaya, Sibu, sereta ngemendarka ngena menira enggau lambang parti ti ngena nama PBDS berengkah ari hari bulan ke sama. 

"Pengudah nerima pemendar ari ROS tu kena30 Ogos tu tadi, ti ngemendarka nukar nama parti enggau indu opis baru ibu (di Sibu), PBDS udah sedia napi Pengawa Bepilih Besai (PRU) ti deka diatur sebarang maya," ku iya. 

Ku Bobby, langgur penemu ningkilka leka jaku 'Baru' di belakang nama PBDS udah dikerandau enggau semua kaban ba renggat nembiak redak, lalu deka dibantaika  dalam Resolusyen Kapit, Gempuru Besai Tiga Taun Sekali (TDC) dalam bulan Mac taun tu tadi. 

Nerang silik, iya madah taja pan kaban parti sepenemu  nukar nama PBDSB (Parti Bansa Dayak Sarawak Baru) ngagai PBDS (nama asal) tang tetap enda sama enggau parti nya ti asal, laban kededua nya ngembuan entiti ke bebida enggau lumur rejista ke bebida. 

Logo parti mengkang sama, ku iya seraya madahka PBDS mega bisi ngaga sekeda konstitusyen parti nya, setipak enggau pemansang ke diatu ambika lebih relevan. 

"Tang semengat kami agi sama laban PBDS ke baru tu deka ngenanka semengat parti ti asal sereta mulaika baru penyulut PBDS baka dalam era 80-an. 

“Politik ditegi PBDS iya nya Agenda Dayak.

"Sebaka enggau pengawa sereta agenda parti bepelasarka bansa bukai, baka PBB ti negika agenda bansa Bumiputera lalu UMNO negika hak bansa Melayu enggau ke bukai.

"Sida mengkang relevan nyentuk ke diatu pengudah ti ditumbuhka,” ku iya. 

Nya alai, PBDS ti parti bebepalarka bansa Dayak enta patut dipeda nyadi ke penanggul tauka sebuah parti politik begedika bansa bukai, tang semina nyadi siti platform politik ti negika bansa Dayak. 

Nyentuk ke diatu ku iya, raban bansa Dayak ti diarika parti pupu bansa bukai bedau nyapai penyulut ke nyelai, ti mandangka pemujur politik enggau sosial ungkup raban bansa Dayak. 

“Nya alai PBDS deka meri terima kasih ngagai Tan Sri Datuk Amar Leo Moggie laban ti udah bebendar  numbuhka PBDS dalam pun taun 80-an,” ku iya.   

Sama bisi maya aum media nya, mandal presiden Sawing Kedit enggau Kaban Kaunsil Tetinggi (MT) Allex Kawang. 

PBDS ditumbuhka kena17 Julai, 1983 lalu indu opis iya di Kuching. Moggie nyadi presiden keterubah nyetukaka iya ngelengkaka nya kena 24 Jun, 2003.

Taja penyarut nyadi ketuai nyadi dalam parti nya urung dalam taun ke sama ti ngujungka rejista parti nya dikinsil lalu direrak ROS kena 5 Disember, taun 2003. 

Pengawa ngidup sereta numbuhka baru parti nya nadai kala padam, lalu kena 28 Ogos, 2013 PBDS Baru (PBDSB) ditumbuhka, lalu indu opis parti direjista di Sri Aman. 

Kena 30 Ogos, 2022, ari baruh pegai Bobby ke nyadi presiden, ROS udah ngemendarka nama PBDSB titukar ngagai nama asal lalu indu opis parti dipindah ke Sibu. 
 

Advertisement