Penyampau nya nyengkaum lapan kes pemati ti diripotka dalam taun tu, ku Dr Rundi
KUCHING: Sarawak ngerikod 47 pemati ari 53 kes ketegal rampit rabies kenyau ari penyakit nya ditukuka nyadi di negeri itu kena Julai 2017.
Menteri Industri Pemakai, Komoditi enggau Pemansang Kandang Menua Datuk Seri Dr Stephen Rundi madah, penyampau nya nyengkaum lapan kes pemati ti diripotka dalam taun tu.
Ku iya, rabies sebansa penyakit ti ngachau sistem urat untak sesiku.
“Enti dirampit, peluang individu suman mipis amat, sereta lebih berisiko ngujungka pemati.
"Taja pia, aku arap amat virus rabies tu ulih ditagang nengah chara nuchuk vaksin enggau chara konsisten sama maya kitai ngelaban COVID-19," ku iya madah maya Aum Rabies in Borneo (RIB) 2022 ba sebuah hotel tebilang ditu,kemari.
Sama bisi datai, Direktor Opis Servis Veterinar (DVS) Sarawak Dr Adrian Susin Ambid enggau Direktor Unit Pengelikun enggau Neritka Adat Sarawak (UKPS) Datuk Dr Chai Khin Chung enggau bala temuai dipebasa ke bukai.
Dr Rundi madahka aum nya diatur pengelama dua hari berengkah ari kemari, endang ngena amat pengudah dua taun ngelaban COVID-19.
Dalam timpuh nya ku iya, Sarawak mega betapi enggau pemar ngelaban penyakit rabies.
“Kami enda nemu pekara tu majak balat nyadi, nya alai aum tu beguna amat kena kitai ngelaban penyakit rabies.
“Kami begunaka kerejasama ari semua bekunsika penemu enggau peneleba kena ngaga chara nyeliah enggau ngelaban nya,” ku iya.
Iya ngarapka aum nya meri pemanah besai kena ngemujurka juluk nadai rabies di Sarawak manggai ba taun 2025.
Dr Rundi mega madahka perintah ngungkupka RM7.07 juta nengah Pelin Kereja Nagang enggau Ngemunaska Rabies.
“Kelimpah ari nya, perintah Sarawak mega numbuhka tim “Immune Belt Enforcement Team” (IBET) kena nagang penama rabies ba sepemanjai garis entara menua Sarawak-Kalimantan ti lebih 1,200 kilometer ari Lundu nyentuk ke Lawas.
“Tim nya mega dipinta nagang pemindah ukui gila, ngemata enggau vaksinasyen ukui enggau DVS Sarawak,” ku iya.
Dulu ari nya, lebih 250 pakar ari Malaysia, Indonesia, Filipina enggau Australia bisi ngulu aum RIB 2022 enggau tuju numbuhka platform alai besilih penemu sereta ngiga strategi ke pemadu baru dikena nagang rabies.
Aum nya diatur beserimbai enggau pengerami Ngintu Hari Rabies Sedunya ti diintu kena28 September tiap taun dikena nambahka penyedar pasal nagang rabies.