Anda di sini

Tim IBET ditumbuh kena nagang pengelekai penyakit rabies di Sarawak

Advertisement
 Chai (dua kanan) begambar ke kenang enggau Abang Johari sereta temuai bukai maya pengerami bejadi IBET ari baruh UKPS, kemari. - Gambar Roystein Emmor
KE ALBUM: Chai (dua kanan) begambar ke kenang enggau Abang Johari sereta temuai bukai maya pengerami bejadi IBET ari baruh UKPS, kemari. - Gambar Roystein Emmor

KUCHING: Bisi 32 tim Immune Belt Enforcement Team (IBET) deka diasuh bejalaika pengawa nyaga garis entara menua Sarawak ti mungkur kandang “Immune Belt” ba garis entara menua ke panjai 1,032 kilometer (km).

Direktor Unit Unit Pengelikun enggau Neritka Adat Sarawak (UKPS) Datuk Dr Chai Khin Chung madah, ari penyampau nya 96 iku raban IBET deka nyaga pemindah ukui sida ba sepemanjai 10.75 km garis entara menua Sarawak.

Ku iya,raban ke dipilih nya endang peranak asal menua nya ti nadai penanggul ba jaku asal menua, budaya enggau geografi ba endur operasyen IBET. 

“Peranak menua nya nadai penanggul nanggam kaul manah enggau raban bansa ke diau ba kandang menua nya, lalu nya siti faktor pemujur tauka faktor pemujur kritikal ba pengawa ti dikereja IBET ila,” ku iya.

Iya bejaku munyi nya maya bejadi IBET ari baruh UKPS ti dipenyadika Premier Sarawak Datuk Patinggi Tan Sri Abang Johari Tun Openg ditu,kemari.

Ku Chai, batang tuju numbuhka IBET iya nya ambika Sarawak nadai kena rampit penyakit rabies sereta ngenanka status nadai  rabies. 

Ku iya, pengawa nya mesti dipajakka seagi penyakit rabies bedau dipunaska magang di negeri tu.

Batang pengawa tim IBET ku iya, bepelasarka enam batang skop .

“Antara nya ningkilka tagit (targeted removal), nyaga pemindah ukui, meri vaksinasyen ba ukui, ngumpul data demografi ukui, nanggam kaul enggau peranak sereta ngiri penemu ngagai sida ti nyadi responden keterubah kena nagang penyakit rabies tu,” ku iya.

Nitihka statistik kes rabies, Chai madahka Sarawak ngerikodka 45 kes ti bekaul enggau pemati kenyau ari taun 2017 nyentuk ke 2022. 

Ku iya, penyampau kes rabies di Sarawak nambah dalam taun 2022 nyentuk ke bulan September ti ngerikodka 11 kes enti dibandingka enggau 10 kes dalam taun 2021. 

“Nitihka pansik ti dipejalaika M. Baer George dalam asil pansik ti dikeluarka iya nengah The Natural History of Rabies, penyakit rabies tu keterubah endar ditemu dalam taun 1768 di Boston U.S.A. 

“Di pulau Borneo, Rabies ditemu dalam taun 1974 di Kalimantan Timur. Orang keterubah kena penyakit rabies di Sarawakdiripotka ba Bagi Menua Serian kena 2 Julai 2017,” ku iya.

Kelimpah di beri pengawa nagang penyakit rabies, Chai mega madahka IBET sedia dibejalaika pengawa ungkup  operasyen Penyakit Jari, Kaki enggau Mulut (HFMD), Renga Babi Afrika enggau penyakit berampit ke bukai,” ku iya.

Advertisement