Tu taun ti kelima Abang Johari mujur nambah penatai pemisi Sarawak ungkup pengelantang rayat nengeri tu
“Sebedau tu urung RM5 bilion nyentuk RM6 bilion. Alhamdulillah, dalam timpuh tiga taun tu, penatai pemisi kitai (Sarawak) udah betambah ngagai urung RM10 bilion ninting taun."
Datuk Patinggi Tan Sri Abang Johari Tun Openg
Premier Sarawak
KUCHING: Sarawak ngarapka deka nambah penatai pemisi ba taun ti deka datai nengah chara baru dalam ngatur ekonomi.
Premier Sarawak Datuk Patinggi Tan Sri Abang Johari Tun Openg madah, kenyau ari megai perintah Sarawak, tu iya nya taun ti kelima iya mujur nambahka penatai pemisi ungkup Sarawak.
“Sebedau tu urung RM5 bilion nyentuk RM6 bilion. Alhamdulillah, dalam timpuh tiga taun tu, penatai pemisi kitai (Sarawak) udah betambah ngagai urung RM10 bilion ninting taun.
“Nya alai, aram mih kitai sama besampi ngambika (penatai pemisi Sarawak) RM10 bilion nambah ngagai RM15 bilion enda lama agi.
“Aku pechaya ba taun ti deka datai penatai pemisi kitai deka betambah enggau chara baru kitai ngatur ekonomi nyengkaum chara baru bakani kitai ngulihka asil nya ila,” ku iya.
Ya madah munyi nya lebuh ti bejaku ba pengerami Makai Lemai Meri Selamat Jubli Perak 25 Taun Sekula Sekondari Agama Tun Ahmad Zaidi (SMKA TUNAZ) ditu, kena malam Hari Enam.
Abang Johari madah pemisinemu gis baru taun tu iya nya tiga di Balingian enggau siti di Wilayah Luconia Tengah ari tasik Bintulu deka nentuka Sarawak ngagai pengawa nyungkak penatai pemisi baru dalam sektor kuara biru enggau gadung.
“Tu deka nentuka kitai dalam ngangkatka penatai pemisi.
“Taja pia kitai patut ngemansangka pengereja pengawa enggau penemu pakar dalam bidang tu,” ku iya.
Beserimbai enggau nya, Abang Johari mega udah ngemendarka sepenyampau RM28 juta dikena ngangkatmanah SMKA TUNAZ.
Ku iya, pemutus nya digaga pengudah prinsipal SMKA TUNAZ, Zainab Hussein madah bekaul enggau guna ti ngansak dalam nyeruri enggau ngangkatmanah begunan sekula, buding enggau kuarters pengajar.
Agih belanja nya, ku iya, nyengkaum enggau meli bas baru ungkup sekula tu.
“Kitai deka meda rintai peminta bukai dalam perambu nya ila. Aku semina minta nembiak enggau pengajar SMKA TUNAZ terus besampika Sarawak ngambika jereki kitai majak nambah,” ku iya.
Sama datai iya nya Sapit Menteri Utiliti enggau Telekomunikasyen (Utiliti) Datuk Dr Abdul Rahman Junaidi; Sapit Menteri Pelajar, Inovasyen enggau Pemansang Pengelandik Dr Annuar Rapaee enggau Direktor Pelajar Sarawak Datu Dr Azhar Ahmad.