KUCHING: Pengawa nempa siku nembiak nyadi ketuai ba sebarang renggat patut dimunka nengah kaul sereta interaksyen enggau komuniti di kandang menua nya.
Pia ku peminta Sapit Menteri Nembiak, Lumba enggau Main enggau Pemansang Orang Dagang (Pemansang Orang Dagang) Dr Ripin Lamat kilah ensana lebuh ti bejaku ba pengerami ngintu Hari Raban Nembiak Renggat Bagi Menua Kuching 2022 di Stadium Perpaduan.
“Taja pia, pansik udah ngayanka raban nembiak diatu kurang ngaul diri enggau program ti bepelasarka komuniti ti renggat kandang menua, genturung pendiau tauka rumah panjai.
“Nyangka kebuah ti besai iya nya daya pengidup diatu ti mayuh udah bekaul enggau teknologi,” ku iya.
Nadai dikeenggaika mega, taja daya pengidup majak berubah ninting hari tang teknologi endang diguna dalam bidang dagang, pelajar enggau pun pemisi penerang ti lengkas.
Tang, bisi mega empas negatif berindik arikelalu bepanggai ngagai ngena teknologi nya, ku iya nyemetak.
“Mayuh elemen negatif dalam teknologi tang raban nembiak anang jampat tepejuh. Nama ti diguna sida iya nya runding ti kritikal,” ku iya nerang baru.
Nya alai, raban nembiak di renggat Institusyen Pelajar Tinggi (IPT) perintah enggau peribit patut ngambi inisiatif dalam ngaul diri enggau aktif dalam program komuniti di tetiap renggat dikena nyamin pengawa nempa pemanah ulah diri ti bisi kualiti.
Pia mega, Ripin dekaka mayuh agi raban nembiak ngaul diri enggau bidang orang dagang.
“Nyadi mih sida ti numbuhka peluang gawa lalu ukai semina ngiga pengawa, taja mayuh pemar ti ditapi sebedau nyadi orang dagang ti mujur,” ku iya nambah.
Bejaku bekaul enggau UNDI18 iya dekaka raban nembiak nya ngaga pilih ti manah dikena nentuka ketuai jemah ila ti deka nempa menua ti meruan sereta mansang.
Beserimbai enggau nya, perambu bekaul program betukar raban nembiak ke diatur perintah besai deka dibai ngagai aum enggau menteri di opis menteri ngambika dipejalaika ila.
Sebedau tu pengerami ngintu Hari Raban Nembiak Menua 2022 udah diatur kena 15-17 Julai nyin tadi di Padang Pasar Tuaran, Sabah ti dipenyadi Menteri Besai Malaysia Dato Ismail Sabri Yaakob.