Anda di sini

Sarawak patut bulih agih belanja ti besai dalam Bajet 2023 menua

Advertisement
Abang Johari ba aum pengarang berita ngarapka Sarawak diungkupka belanja besai dalam Bajet 2023 menua. Lalu diperatika (duduk, ari kiba) Takiyuddin enggau (duduk, ari kanan) Len enggau Awang Tenggah sereta sida ke bukai,  kemari.- Gambar Muhammad Rais Sanusi
Abang Johari ba aum pengarang berita ngarapka Sarawak diungkupka belanja besai dalam Bajet 2023 menua. Lalu diperatika (duduk, ari kiba) Takiyuddin enggau (duduk, ari kanan) Len enggau Awang Tenggah sereta sida ke bukai, kemari.- Gambar Muhammad Rais Sanusi

Dikena nentuka pemansang perengkaguna ti meruan ungkup pengelantang, pemaik rayat nengeri tu

"Endang kitai ngarapka bisi beberapa bantu ungkup belanja (diberi) ngagai Sarawak, baka selama.

Datuk Patinggi Tan Sri Abang Johari Tun Openg 
Premier Sarawak


Dikarang Rengenyan Labang

SANTUBONG: Premier Sarawak Datuk Patinggi Tan Sri Abang Johari Tun Openg ngarapka Sarawak diungkupka belanja ti besai dalam Bajet 2023 menua.

"Endang kitai ngarapka bisi beberapa bantu ungkup belanja (diberi) ngagai Sarawak, baka selama.

"Udah tentu nama ke dikearapka kitai ungkup belanja nya besai, tadi aku nyebut join-venture," ku iya nyaut enggau pandak lebuh ditanya bekaul enggau nama ke diarapka perintah Sarawak ari Bajet 2023 menua.

Iya dikerandau pekara nya ba aum pengarang berita 'Pemasyhuran Sarawak Delta Geopark (SDGp)' ti diatur Opis Menteri Pengeraja Asal enggau Pemansang Mengeri enggau Opis Kampung Sarawak ba Dewan Lagenda, Kampung Budaya Sarawak, ditu, kemari.

Bajet 2023 dipelabaka deka dibantaika ba Parlimen kena 7 Oktober ke deka datai tu, sereta bajet nya diadang dibantaika MenteriKewangan , Tengku Datuk Seri Zafrul Tengku Abdul Aziz.

Dulu ari nya lebuh bejaku ba pengerami  'Pemasyhuran Sarawak Delta Geopark (SDGp)', Abang Johari madahka perintah negeri bisi nyendiaka infrastruktur baka jalai alun sereta jematan ngena belanja perintah nengeri.

Iya madahka infrastrutur nya dikena nyambungka kandang endur ti kena bungkur SDGp, kena meri pengelantang ngagai raban bansa, temuai ari dalam enggau luar menua datai ngelawa geopark.

"Kitai ngaga tu (jalai alun enggau jematan) ngena duit kitai empu (perintah negeri).

"Enti ulih Menteri Energi enggau Pengeraja Asal Malaysia nambahka mimit,. Taja negeri bisi ungkup belanja dikena bejalaika tu, enti ulih kitai join-venture," ku iya.

Sama bisi ba aum pengarang berita tu kemari, Sapit Premier Sarawak ti mega Menteri Pengeraja Asal enggau Pemansang Mengeri Datuk Amar Awang Tengah Ali Hasan, Menteri Energi enggau Pengeraja Asal Malaysia Datuk Seri Takiyuddin Hassan, Sapit Menteri Perambu Mengeri, Administrasyen Tanah enggau Rampa Menua ti mega nyadi Chairman Komiti Pemandu Sarawak Delta Geopark sereta Chairman Komiti Besai Pengerami Pemasyhuran Sarawak Delta Geopark Datu Len Talif Salleh enggau pemesai ke bukai.
 

Advertisement