Ti besai rega dalam tikas kandang menua tu, nasional enggau mega tikas antarabansa, ku Abang Johari
"Siti agi pekara deka dipekunsi aku iya nya kitai nemu bisi 28 geotapak ti udah dikelala ti nyengkaum bisi lapan geotapak berega dalam tikas kandang menua tu, lapan geotapak (berega tikas nasional) enggau 12 geotapak berega tikas antarabansa. Sereta semua tu dalam pansik, kitai bejalaika pansik.
Datuk Patinggi Tan Sri Abang Johari Tun Openg
Premier Sarawak
Dikarang Rengenyan Labang
SANTUBONG: Sarawak bisi 28 'geotapak' ke udah dikelala ulih diangkat nyadi Geopark ti besai rega tikas kandang menua tu, nasional enggau antarabansa.
Premier Sarawak, Datuk Patinggi Tan Sri Abang Johari Tun Openg madahka geotapak ti udah diikelala nya benung dipansik.
"Siti agi pekara deka dipekunsi aku iya nya kitai nemu bisi 28 geotapak ti udah dikelala ti nyengkaum bisi lapan geotapak berega dalam tikas kandang menua tu, lapan geotapak (berega tikas nasional) enggau 12 geotapak berega tikas antarabansa. Sereta semua tu dalam pansik, kitai bejalaika pansik.
"Sereta siti iya nya kaul kitai enggau Geopark bukai, dalam reti jaku bukai, kitai ngemanahka agi (Geopark) serata Malaysia enggau chara pemuliharaan kitai.
"Jaku Menteri Besai (Datuk Seri Ismail Sabri Yaakob) ba aum Pertubuhan Bangsa-bangsa Bersatu (PBB) pasal bungkur kampung 54 peratus, kitai komited ulih ngemenuh tauka napi peminta antarabansa laban ubah gaya hari tu, enggau ari 54 peratus tu Sarawak mega mayuh menyumbang - 52 peratus ari penyampau jisim tanah kitai," ku iya.
Abang Johari madahka pekara tu dalam aum pengarang berita 'Pemasyhuran Sarawak Delta Geopark (SDGp)' ti diatur Opis Menteri Pengeraja Asal enggau Pemansang Mengeri enggau Opis Kampung Sarawak ba Dewan Lagenda, Kampung Budaya Sarawak, ditu, kemari.
Dulu ari nya Abang Johari bejaku madahka SDGp udah diaku nyadi Geopark Kebangsaan ti ke-16 maya baum Komiti Geopark Kebangsaan kena 20 Jun 2022.
SDGp ku iya, kandang endur ke bisi pesaka geologi, biologi enggau budaya ke udlih dikena semua orang ungkup nyaga, pelajar enggau pemansang ti tegap.
"Tu siti rega ti tinggi dalam pengeran kitai deka ngetankan pemanah rampa menua ti meruan enggau mega ke pemadu beguna semua sumber ti bisi ba endur tu (SDGp) ari sukut sejarah, penemu geologi, biodiversiti, enggau budaya ti bisi ba kandang endur tu.
"Tu siti pengawa ngenukuka ti pemadu beguna ngagai kitai di Sarawak, enggau aku beterima kasih ngagai Datuk Seri Takiyuddin Hassan (Menteri Energi enggau Pengeraja Asal Malaysia) laban tadi disebut tadi kandang endur tu (SDGp) nyadi chalon diisytiharkan nyadi siti palan UNESCO Global Geopark ari baruh UNESCO (Pertubuhan Pendidikan, Sains dan kebudayaan Pertubuhan Bangsa-Bangsa Bersatu).
"Enti tu bulih pemutus ti manah, udah tentu ulih nambah tauka nyungkakka agi pemansang ke bisi kandang endur tu (SDGp) kelimpah ari kitai ngetanka rega ke disebut aku tadi," ku iya.
Bejaku baru iya madahka, ari sukut ekonomi iya deka meri empas ti besai ukai semina ari sukut industri dagang temuai tang mega kitai ngetanka utai tumbuh ke bisi ditu (SDGp) ti deka nyadi igi tauka leka kena kitai nyerungkai enggau silik agi potensial ke bisi dalam industri biodiversiti.
"Diatu kitai meda sektor perubat deka ke tauka begunaka molekul tauka kompaun ti ulih nyadi asas perubat kena betapi enda ngira bansa penyakit, bisi mega penyakit baru baka pandemik COVID-19 iya nya fenomena baru, enggau (chara) tu engka kitai ulih ngeluarka vaksin.
Iya mega madahka SDGp ti sepemesai 3,112 kilometer persegi iya nya kedua besai di Malaysia nangkan Kota Kinabalu sereta enggau pemesai kandang endur nya begunaka perengka guna ti meruan dikena meri pengelantang ngagai raban bansa sereta temuai ari dalam enggau luar negeri ngelawa kandang endur ke dibungkur SDGp.
"Kelimpah ari nya perintah kitai udah merambu sereta dipasukka dalam Langgur Pemansang Malaysia Lumpar Ke-12 ngemanahka jalai alai, perengka guna mensia mayuh nyengkaum ditu nyentukke Bau. Kandang endur ditu deka disambungka enggau infrastruktur ti manah ungkup raban bansa ngelawa kandang endur nya," ku iya.
Sama bisi datai ba pengerami tu kemari, Sapit Premier Sarawak ti mega Menteri Pengeraja Asal enggau Pemansang Mengeri Datuk Amar Awang Tengah Ali Hasan, Menteri Energi enggau Pengeraja Asal Malaysia Datuk Seri Takiyuddin Hassan, Sapit Menteri Perambu Mengeri, Administrasyen Tanah enggau Rampa Menua ti mega nyadi Chairman Komiti Pemandu Sarawak Delta Geopark sereta Chairman Komiti Besai Pengerami Pemasyhuran Sarawak Delta Geopark Datu Len Talif Salleh enggau pemesai ke bukai.