Anda di sini

Bajet 2023: Perintah besai dikearap meri agih belanja ti besai ngagai Sarawak

Advertisement
Awang Tengah (tengah) lebuh dikerandau raban pengarang berita, kemari.
Awang Tengah (tengah) lebuh dikerandau raban pengarang berita, kemari.

Dikena bejalaika mayuh bengkah pekara ke lebih agi projek pemansang infrastruktur

"Kitai begunaka ungkup belanja mayuh dikena kitai bejalaika projek infrastuktur, jalai alun, jematan, bekal ai enggau karan sereta sistem telekomunikasyen.

Datuk Amar Awang Tengah Ali Hasan
Sapit Premier Sarawak

Dikarang Rengenyan Labang

KUCHING: Perintah besai dikearapka deka ulih meri ungkup belanja ti lebih besai ngagai Sarawak dalam Bajet 2023, dikena bejalaika mayuh bengkah pekara ke lebih agi projek pemansang infrastruktur.

Sapit Premier Sarawak, Datuk Amar Awang Tengah Ali Hasan ngarapka negeri ulih diperunding sereta diberi ungkup belanja ti lebih mayuh agi.

"Kitai begunaka ungkup belanja mayuh dikena kitai bejalaika projek infrastuktur, jalai alun, jematan, bekal ai enggau karan sereta sistem telekomunikasyen.

"Kitai mega deka ke ungkup belanja ti mayuh dikena kitai ngaga lebih mayuh agi industri ladang ke lebih agi di kandang menua ulu, menua pesisir enggau numbuhka mayuh agi premis alai bedagang dikena kitai nyukung pemansang industri mit enggau jelan pemesai.

"Kitai mega deka ungkup belanja diberi ngagai kitai awakka bisi dikena bejalaika lebih mayuh agi program ari sukut ekonomi, program kena ngangkatka agi pengelantang pendiau pengidup raban bansa, dalam pengeran kitai nyungkakka penatai pemisi raban bansa enggau munaska penyeranta ke nyadi ba raban bansa kitai," ku iya lebuh ditanya bekaul enggau pengarap iya ba Bajet 2023 ti deka dibantaika enda lama agi.

Iya ti mega Menteri Dagang Antarabansa, Industri enggau Pemeranak Puku (MINTRED) dikerandau raban pengarang berita ba aum pengarang berita Anugerah Usahawan Bumiputera Sarawak (AUBS) 2022 ke diatur ba Bilik Baum MINTRED di Wisma Sumber Alam ditu, kemari.

Bejaku baru iya madah enggau gaya sekula sereta fasiliti pengerai di negeri tu ke mayuh udah tuai sereta jai, Sarawak begunaka ungkup belanja ti mayuh kena ngaga, ngemanah tauka nyeruri.

"Kitai deka ke ungkup belanja ti mayuh dikena ngemanahka agi infrastruktur pelajar laban mayuh sekula kitai ti udah kelalu tuai sereta jai ti begunaka sekula baru, tauka patut dikemanahka.

"Ari segi pengerai, kitai begunaka mayuh ungkup belanja dikena ngemanahka agi sepital enggau ngaga sepital baru. Mayuh pelilih menua di Sarawak ke nadai sepital, enggau mega klinik kitai di menua pesisir. 

"Mayuh pekara ke patut digaga enggau dikemanahka agi, enggau kebuah nya amat patut kitai bulih ungkup belanja ti lebih mayuh, dalam pengeran kitai deka nyungkakka pemansang," ku iya.

Nambahka nya orang dagang negeri ke lebih agi dalam sektor dagang mit enggau jelan pemesai iya nya entara sektor tekeruga ketegal COVID-19 mega begunaka bantu dikena ngepunka dagang, ku iya.

"Nyadi nya entara (nama ke diarapka), ti pemadu beguna  iya nya kitai ngarapka perintah besai deka meri ungkup belanja ti lebih ngagai kitai kena kitai nembu tauka nyikap perengka guna kitai," ku iya.

Kelimpah ari nya, iya ngarapka perintah besai nyema udah ditetapka ungkup belanja dikena kitai ngaga sesebengkah projek, patut bisi mekanisme pejalai projek nya.

Lalu mekanisme pejalai projek nya mega patut dialuska agi awakka enda ngira nama bagi projek ti dikemendar digaga ambika banding ungkup taun baru sereta ungkup belanja udah diberi, ku iya, projek nya patut digaga dalam timpuh nya.

"Taja bedau sampal tembu, tang iya patut digaga. Nya alai mekanisme ari segi ngaga projek nya patut dialuska. Enti enda baka nya ungkup belanja bisi tang enda dikena. Benung dalam langgur enggau ke bukai sereta taun nangkan ke nya projek ti sama deka dipadah, kitai enggau pekara ti baka tu.

"Nyema kitai diberi ungkup belanja dikena ngaga projek, sereta kitai deka projek nya digaga enggau tu begunaka chara kitai ngaga iya," ku iya seraya nandu mekanisme ngaga projek patut dialuska agi.

Bajet 2023 dipelabaka deka dibantaika ba Parlimen kena 7 Oktober ke deka datai tu.
 

Advertisement