Anda di sini

Sarawak ngarapka ulih nyadi pengekport pemakai beresi dalam taun 2030

Advertisement
Dr Rundi slebuh ke bejaku maya aum media di Bintulu, kemari.
Dr Rundi slebuh ke bejaku maya aum media di Bintulu, kemari.

BINTULU: Sarawak ngarapka ulih ngemujurka juluk ati nyadi pengekport pemakai beresi dalam taun 2030, nengah chara nambah manah nitihka chara diri empu dalam strategi sekuriti pemakai ti udah disetuju ba renggat perintah besai. 

Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom madah, juluk ati nya mar sereta besai,tang  opis menteri sedia napi nya lalu enggau naka ulih ngemujurka nya.

Ku iya, nya mungkur semua bansa pemakai dalam dunya baka utai tanam, nupi jelu,ba pengawa betanam ke diatu Sarawak bisi zon betanam Industri Akuakultur Rambungan entara Lundu enggau Kuching alai nupi undang, ikan, ketam enggau utai bukai lalu asil nya udah ngagai menua  tasik.

"Ambika chunto, udang dieskport ngagai Hong Kong, New Zealand enggau ke bukai, lalu aku dipadahka udah ngemansutka asil RM400 juta," ku iya madah maya aum media pengudah nyuaka geran Projek Mit Pemasnang Menua Peisir  (MRP) enggau Projek Nambah Manah Rumah Seranta Sarawak (PPRMS) ngagai penerima sitak Kunsil Negeri (DUN) N.69 Kemena ba Opis Betanam Betupi Bagi Menua Bintulu,kemari.

Ku Dr Rundi baru, iya dipadahka 7,000 hektar tanah deka diguna alai ngaga pegung ikan enggau undang kena ngemansutka asil RM1 bilion setaun.

"Ari sukut betanam betupi, kitai ngeluarka 12 peratus asil ari Sarawak nengah pemansut kasa dalam menua (GDP) sepenyampau RM16 bilion," ku iya. 

Nya alai ku iya, Premier Sarawak Datuk Patinggi Tan Sri Abang Johari Tun Openg meda opis menteri betanam  betupi nyadi opis menteri ke beguna amat, ngujungka iya setuju nukar nama nya laban beratika pengawa ti dikereja nya beguna amat kena ngemansutka asil ari segi ringgit enggau sen.

Ku Dr Rundi, diatu Sarawak deka ngangkatka tikas pengidup rayat manah agi dalam sektor betanam betupi.

Taja pan bisi tanah, tang rayat di menua pesisir semina bisi peneleba mimit ku iya, nya alai mesti bisi chara baru  kena sida ngulihka penatai pemisi ke manah agi nengah chara belajar sereta ngemeranka betanam betupi ti ulih meri penguntung ke manah agi dikena sida beridup, anak besekula sereta nambahka penatai pemisi nyentuk RM6,000 sebulan.

"Kami nemu pasti sekuriti pemakai nya sektor ke beguna amat, nya alai kena nyikap negeri tu nyendiaka pemakai ungkup raya, enti pengeksport pemakai ari menua luar enda ulih ngeksport nya ke menua tu," ku iya. 

Nya kebuah ku iya, opis menteri nya diberi nama baru iya nya Industri Pemakai, Komoditi enggau Pemansang Kandang Menua lalu ke suba nya bisi tiga opis menteri dalam siti, iya nya Opis Menteri Pemansang Menua Pesisir,Opis Menteri Pemansang Tanah enggau Opis Menteri Betanam Betupi.

"Aku ukai deka nyadi hero (nyadi  ketuai opis menteri tu) tang aku nemu utai ti patut digaga enggau utai ti enda tau dikereja sesiku, tang kerejasama semua nyengkaum rayat kitai ulih ngubah chara betanam, ngiga belanja enggau ngemasutka asil (utai tanam) asi sukut komersial ti lalu nambahka penatai pemisi kelebih agi raban B40," ku iya.

Ba renggat perintah besai ku iya, opis menteri iya bisi kaul engagu Opis Menteri Pemansang Menua Pesisir (KPLB), Opis Menteri Industri Ladang enggau Komoditi (MPIC) sereta Opis Menteri Btanam Betupi enggau Industri Pemakai (MAFI).
 

Advertisement