Kunteriktor baru dichiri lalu projek ngaga jematan nya disadang tembu dalam ujung taun 2024, ku Abang Johari
"Aku beratka pekara tu (Jematan Marudi), aku enggau Sapit Premier Sarawak Datuk Amar Douglas Uggah Embas ngiga chara mutarka nya”
Datuk Patinggi Tan Sri Abang Johari Tun Openg
Premier Sarawak
MIRI: Projek ngaga Jematan Marudi kena meraka Sungai Baram pemanjai 650 meter deka diteruska lalu kunteriktor baru ti ngembuan mayuh agi peneleba, deka dipilih.
Premier Sarawak,Datuk Patinggi Tan Sri Abang Johari Tun Openg madah kunteriktor ke sebedau tu udah diketuka lalu disilih ngena kunteriktor baru laban projek nya enda ngaga nitihka perambu.
"Aku beratka pekara tu (Jematan Marudi), aku enggau Sapit Premier Sarawak Datuk Amar Douglas Uggah Embas ngiga chara mutarka nya.
"Pengujung iya, kunteriktor lama diketuka kami nitihka prosedur ke bisi,kami milih kunteriktor baru ti ngembuan peneleba ngaga Jematan Niang Datuk Patinggi Tan Sri Adenan Satem," ku iya lebuh ke nemuai seraya Kereja ngagai Pelilih Menua Marudi, kemari.
Ku Abang Johari, pengudah kunteriktor baru dipilih, projek ngaga Jematan Marudi begunaka timpuh 32 bulan baka ti dipadahka Opis Kereja Raya (JKR) lalu disadang tembu digaga kena ujung taun 2024.
"Aku meda semua barang kena ngaga nya mega udah bisi ditu lalu arapka projek jemata ti nyantilka Miri-Marudi tu tembu digaga ujung taun 2024," ku iya.
Tambah Abang Johari, enti jematan nya tembu digaga, mensia mayuh ulih pulai mansang ari Miri ke Marudi tauka Baram ti lalu ngangkatka ekonomi peranak menua nya.
"Perintah mega udah merambu ngaga jalai alun ke besai di Baram lalu nya begunaka timpuh entara lima nyentuk enam taun,nembuka nya.
"Kami (perintah negeri) deka ngiga belanja kena ngaga projek jalai tu, lalu enti udah tembu digaga ila, nya deka muka kandang menua Baram ti lalu ngangkatka aktiviti ekonomi rayat," ku iya.
Ku Abang Johari, taja pan ungkus ngemansangka menua pesisir besai, tang perintah berani ngambi risiko sereta ngiga belanja dikena ngemujurka projek ti diperambu nya enggau chara berenggat.
"Tagit aku dalam taun 2030, negeri Sarawak deka nyadi negeri ti pemadu maju di Malaysia, lalu nya kebuah ngena penatai pemisi nya kami deka majak ngaga pemansang infrastruktur," ku iya.
Kelimpah ari isu jematan Marudi, Abang Johari lebuh ke nemuai seraya kereja nya bisi diberi penerang pasal penangglu bekal ai enggau projek Waterfront Marudi.
Pengawa meri penerang nya dikenataika JKR, Opia Kunsil Marudi,Opis Agama Islam Sarawak enggau Opis Bekal Ai Meua Pesisir Sarawak.
Sama bisi enggau maya nya,Sapit Premier Sarawak Datuk Amar Douglas Uggah Embas, Sapit Menteri Pengerai Mensia Mayuh, Pengawa Berumah enggau Kaunsil Kandang Menua Sarawak Datu Dr Penguang Manggil, Sekretari Perintah Negeri Sarawak, Dato Sri Mohamad Abu Bakar Marzuki enggau Tan Sri Datuk Ling Chiong Ho (Syarikat Pekerjaan Piasau Konkerit Sdn Bhd.