Ngelempungka tating belanja rayat kelebih agi pengudah betapi enggau pandemik COVID-19
“Enda ngira sapa ti nerima enggau nadai nerima, aku deka semua bulih agih belanja, reti nya semua bulih mimit bantu enda ngira penerima nya peranak di genturung pendiau, rumah panjai, sekula enggau ke bukai, ti pemadu beguna sapa ke begunaka nya, kitai deka mantu,”
Dato Sri Dr Stephen Rundi Utom
Menteri Industri Pemakai, Komoditi enggau Pemansang Kandang Menua Sarawak
BINTULU:Perintah Sarawak bebendar mantu rayat dalam betapi enggau inflasi tu sereta pandemik COVID-19 ke nyadi dalam timpuh dua taun ti udah, kelebih agi rayat ti penatai pemisi mit ke begunaka bantu.
Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom madah, enggau gaya penatai pemisi ti manah, perintah Sarawak udah melanjaka dalam bilion ringgit bantu nengah program Bantu Khas Sarawakku Sayang (BKSS) ari BKSS 1.0 nyentuk 9.0.
Ku iya, agih belanja nya dikena mutarka pemar COVID-19 enggau penanggul bukai ari sukut tating penusah pengidup rayat diatu nyentuk perintah nyangka begunaka mayuh agi kelebih agi ungkup B40 sereta raban ti kurang penatai pemisi.
“Ukai semina di Sarawak, tang mega semua pengari rayat udah diberi jaku tangkan ngambika mantu rayat ari baruh bidang kuasa enggau sitak sida empu ngambika ulih ngelempungka tating belanja ungkus pengidup ti diasaika rayat,” ku iya.
Iya madah munyi nya lebuh nyuaka geran Projek Mit Menua Pesisir (MRP) enggau Program Ngemanah Rumah Rayat Miskin Sarawak (PPRMS) ungkup penerima di sitak Kunsil Nengeri (DUN) N.69 Kemena di Opis Betanam Betupi Bintulu, kemari.
Kaban Kunsil Nengeri (ADUN) Kemena nya madah, pengawa nyuaka geran tu iya nya ti ketiga kali ungkup rayat di sitak iya lalu ti keempat kali deka diatur jemah ila, dana perintah sama mega deka diagihka ngagai rayat enggau enda bechiping.
“Enda ngira sapa ti nerima enggau nadai nerima, aku deka semua bulih agih belanja, reti nya semua bulih mimit bantu enda ngira penerima nya peranak di genturung pendiau, rumah panjai, sekula enggau ke bukai, ti pemadu beguna sapa ke begunaka nya, kitai deka mantu,” ku iya nerang.
Ku iya, nyema bisi ti enda nerima bantu dalam taun tu, anang putus pengarap laban taun nyin ila dana ti sama deka diagihka ngagai sapa ti bedau nerima nya lalu agih belanja tu enda diberi ngagai sida ti sama semanjai taun.
“Kelimpah ari nya, kitai patut ngagihka ungkup semua enggau sama bela laban kitai enggaika orang madah kitai tu bechiping sereta mayuh agi,” ku iya.
Iya mega nambah, agih belanja bantu tu diberi ngagai Komiti Pemansang enggau Pengelikun Genturung Pendiau (JKKK) rumah panjai, genturung pendiau enggau sekula di sitak DUN Kemena dalam gaya geran ti ngaul 36 iku penerima MRP enggau lima penerima PPRMS dikena mantu melanja aktiviti sida enggau penyampau semua bisi RM1.1 juta.
Berindik ari nya, iya mesan ngagai bala penerima ngambika ngena bantu tu enggau memanah lalu meri ripot asil ari agih belanja ti udah dikena ngagai indu opis Unit Matau Bejalaika Projek Nengeri (SIMU).