Anda di sini

Sarawak deka nyadi pengeluar keju, dagin kerebau 'halal' lumur satu di rantau tu

Advertisement
Dr. Rundi (tengah) maya aum pengarang berita pengudah ngemataka pengawa nyai Sempekat Kerejasama, seraya disempulang (ari kiba) Dr. Adrian,Dr. Abdul Rahman enggau Edwin enggau Martin (ari kanan).
Dr. Rundi (tengah) maya aum pengarang berita pengudah ngemataka pengawa nyai Sempekat Kerejasama, seraya disempulang (ari kiba) Dr. Adrian,Dr. Abdul Rahman enggau Edwin enggau Martin (ari kanan).

KUCHING: Sarawak deka nyadi pengeluar keju enggau dagin 'halal' lumur satu di rantau tu nengah kerejasama Gerempung Peladang Negeri Sarawak (PPNS) enggau kompeni menua tu, Green Vally Dairy Sdn Bhd  nengah projek nupi kerebau, dagin enggau keju halal di Maragang, Lawas.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madahka perintah udah ngungkupka RM15 juta kena ngepun lalu semua perambu kena ngemujurka projek nya.

"PPNS begulai enggau raban pemeranak puku ke udah bisi peneleba enggau orang ke pandai dalam bidang nya ti bisi ati kerebau sereta udah ngaga sebuah kilang kena ngaga keju mozarella ke digaga ari tusu kerbau ti pemadu bekualiti tinggi.

"Kilang keju nya benung digaga sereta deka tembu tengan taun 2024. Produk (keju) deka dijual nengah pemeranak puku ke udah bisi makit," ku iya.

Iya madahka pekara tu maya aum pengarang berita pengudah pengawa nyain Sempekat Meragang Green valley Dairy Sdn Bhd ungkup Projek Beranaka Kerebau enggau Ngaga Keju ba Stesyen Nupi Kerebau, Meragang, Lawas ke diatur ba Hotel Imperial ditu, kemari.

Ngenang pekara nya enggau lebih silik, Dr. Rundi madahka kandang menua Meragang chukup engkeman nyadi kandang endur ngeluarka keju.

"Peranak ba endur nya endang orang betanam betupi mit,udah nupi kerbau kenyau ari kelia nyentuk ke diatu tang sida ngena chara mit.

"Diatu engka urung 7,000 iku kerebau ti ditupi urung 600 iku orang ba kandang menua tu.

"Nya alai kami nemu endur tu engka ulih bisi potensial ngeluarka keju," ku iya seraya madahka Ketuai Pemesai eksekutif Green Valley Dairy Sdn Bhd Dr Raja Imran Shah mega nemu kandang menua Meragang ulih ngasilka urung 5,000 liter tusu kerebau tiap hari.

20 peratus ari penyampau nya ku iya, deka dikena ngasilka keju.

Dulu ari nya,Dr. Rundi ngemataka PPNS enggau Green Valley Dairy Sdn Bhd nyain Sempekat Kerejasama  ungkup projek begulai nupi,ngasil enggau nyual produk kerbau, dagin kerebau enggau keju halal ari tusu kerebau ari negeri Sarawak.

Sempekat Kerejasama nya kemari disain Chairman Kaban Direktor PPNS ti mega Sapit Menteri Industri Pemakai, Komoditi enggau pemansang Kandang Menua Sarawak Datuk Dr Abdul Rahman Ismail enggau Green Valley Dairy Sdn Bhd diarika Ketuai Pemesai Eksekutif, Dr Raja Imran Shah.

Green Vally Dairy Sdn Bhd sebuah kompeni Bumiputera negeri Sarawak ti nyual dagang dagin, tusu enggau asil tusu dairy enggau produk bukai ti halal.

Ungkup projek tu, nya dipunka nengah ngemansang Pelilih Menua Limbang enggau Lawas nyadi pelilih menua ti keterubah alai palan ngumpul, memproses enggau mungkus produk.

Berindik ari pekara tu, kompeni deka bebendar nambah enggau ngerembaika program sereta deka ngadaka 500 iku pesereta baru lebuh manggai ba taun 2025 ari rnegeri tu.

Program tu deka ngasilka kerebau sepenyampau 1,000 iku tiap taun nengah program Artificial Insemination (AI) ti ngena teknologi enggau penau chara beranak ti pemadu baru, kelimpah ari kompeni mega komited nempa anak ke ngembuan pengelandik nengah program ke udah diatur.

Sama bisi ngulu pengerami tu kemari, Sapit Menteri Industri Pemakai, Komoditi enggau Pemansang Kandang Menua Sarawak Martin Ben, Sekretari Mendam Opis Menteri Datu Edwin Abit enggau Direktor Opis Servis Veterinar Sarawak (DVSS) Dr. Adrian Susin Ambud.
 

Advertisement