Berindik ari nya RM3 juta dikemendarka dikena bejalaika projek transformasyen padi AgriHub@Gedong: Dr Rundi
"Siti agi inisiatif iya nya projek transformasyen padi di Gedong , iya nya AgriHub@Gedong. Tu singkang keterubah kitai deka meda bakani chara kitai ulih ngena R&D ke dikembuan kitai,kena nyingkang sesingkang dalam langgur kitai”
Dato Sri Dr. Stephen Rundi Utom
Menteri Industri Pemakai, Komoditi enggau Pemansang Kandang Menua Sarawak
Dikarang Rengenyan Labang
KUCHING: Perintah Sarawak udah ngemendar sereta meri ungkup belanja RM3 juta dikena bejalaika projek transformasyen padi, AgriHub@Gedong ti nyadi siti pemungkal nuju ngagai chara betanam betupi pintar di Sarawak.
Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom madah, nengah projek nya ulih meda bakani Pengawa Mansik enggau Pemansang (R&D) ulih dipejalaika.
Projek transformasyen padi, AgriHub@Gedong nengah sempekat pemereti ati (MoU) ke udah disain deka dipejalaika begulai entara Universiti Putra Malaysia (UPM) enggau Swinburne University of Technology Sarawak Campus sereta disukung opis menteri.
"Siti agi inisiatif iya nya projek transformasyen padi di Gedong , iya nya AgriHub@Gedong. Tu singkang keterubah kitai deka meda bakani chara kitai ulih ngena R&D ke dikembuan kitai,kena nyingkang sesingkang dalam langgur kitai.
"Aku nemu, bepelasarka utai ke diperatika aku beberapa bulan dalam opis menteri, kitai mesti ulih nempa ukai semina ekosistem tang mega patut ulih nempa rentayan penuh pemekal ari R&D.
"Nya kebuah kami beguna penau enggau pemandai kita raban akademik ti enda ngira nama teori, lalu ari nya kitai nyingkang sereta ngemeranka nama ke relevan, nama ti ulih dipejalaika kitai lalu udah nya diterang ngagai orang betanam betupi," ku iya.
Dr. Rundi madahka pekara nya lebuh ke bejaku ba Congress On Sustainable Agriculture and Food Security 2022 (COSAFS2022) ti dipenyadi Premier Sarawak Datuk Patinggi Tan Sri Abang Johari Tun Openg, ke diatur UPM Kampus Bintulu (UPMKB) enggau kerejasama Opis Menteri Industri Pemakai, Komoditi enggau Pemansang Kandang Menua ba sebuah hotel ditu, kemari.
Nitihka penerang berita ti disadung ngagai raban pengarang berita, AgriHub@Gedong iya nya siti pemun nuju ngagai chara betanam betupi pintar di Sarawak.
Berindik ari krisis pemakai dipelaba nyadi sereta ngirauka ati, chara nambahka pemansut pemakai iya nya pemadu betul, UPMKB enggau perintah Sarwak ngepun sereta ngemajuka sektor betanam berupit di Sarawak.
Batang Juluk projek AgriHub@Gedong kena nambah produktiviti padi ari dua tan per hektar gagai 10 tan per hektar, iya nya lima kali ngetau tetiap dua taun ngena 'teknologi perapi tanah' enggau betanam betupi pintar asil pansik UPMKB yi deka nyungkakka penatai pemisi orang betanam betupi di Gedong.
UPMKM bejalaika tanggungpengawa mindahka teknologi ngena chara ti pemadu manah betanam betupi, dikena nyungkak produktiviti betanam betupi enggau juluk deka nempa Gedong nyadi hab betanam betupi.
Batang juluk pengawa mansik ti dipejalaika UPMKB iya nya kena ngangkatka pemansang ekonomi negeri enggau menua, lalu udah nya ngangkatka kualiti idup rayat.
Kelimpah ari nya, Dr. Rundi madahka opis menteri iya komited nyukung Polis Agropemakai Menua 2021-2030 (NAP 2.0) ti dikemansangka Opis Menteri Betanam Betupi enggau Industri Pemakai (MAFI) ti negika chara ngadu enggau efisyen sereta ngemoden pemansut agro-pemakai.
"Opis menteri kami arap bendar ati NAP 2.0 dikemujurka nengah visyen dikena ngemansangka sektor agropemakai ti tegap, ulih besemekih sereta ngemeranka teknologi dikena nyungkak pemansang ekonomi," ku iya seraya ngarapka kongres nya nyadi deka nyadi pelasar raban profesiolis baka raban saintis, akademik, pemansik, pengemeran, pengaga polisi enggau pengemeran industri ti bekaul enggau betanam betupi tegap sereta sekuriti pemakai, ulih berandau enggau besilih penemu enggau mantaika asil pansik.
Dulu ari nya dalam jaku pengelalu, Mandal Chancelor UPM Datuk Profesor Dr. Mohd Roslan Sulaiman madahka COSAFS2022 ti diatur 21 nyentuk 22 September tu digulu lebih ari 200 iku pesereta nyengkaum raban akademik, saintis pemansik, pengaga polisi enggau pemesai ari sektor opis perintah enggau peribit ti deka mantaika pekara bekaul enggau bidang betanam betupi tegap enggau sekuriti pemakai.
"Dikearapka orang ti bejurai enggau pengari ngena peluang tu nyerungkai enggau besilih penemu enggau inovasyen setipak enggau batang tuju aum, ti meransang enggau ngenegapka kerejasama antarabansa enggau nasional dalam betanam betupi tegap enggau sekuriti pemakai," ku iya.