Nya mega ulih nambahka penau nyiri PM enggau TPM ari Borneo tang beguna sukung parti bukai kena numbuhka perintah
"Penemu ungkup kerusi ti dipegai Sarawak enggau Sabah mesti dipulaika ngagai nisbah 35 peratus baka ke sebedau tu,endang pekara ke manah”
Mandal Presiden PBB
Datuk Seri Abdul Karim Rahman Hamzah
KUALA LUMPUR: Mandal Presiden Parti Pesaka Bumiputera Bersatu (PBB),Datuk Seri Abdul Karim Rahman Hamzah madah, 35 peratus kerusi parlimen ungkup Sarawak enggau Sabah endang kena nerabai hak negeri Borneo.
Ku iya, taja pan tu ulih nambahka penau nyiri Menteri Besai (PM) enggau Sapit Menteri (TPM) ari Borneo,tang nya mega begunaka sukung parti bukai kena numbuhka perintah.
“Aku nadai nimpai meda bisi pangku pengawa PM enggau TPM laban nya begunaka sukung.
"Sukung ari parti tauka parti ke menang ti numbuhka perintah pengudah pengawa bepilih," ku iya madah maya aum media ba hotel Berjaya Times Square ditu,kemari.
Abdul Karim ke mega Menteri Dagang Temuai, Industri Kreatif enggau Seni Pemerindang madah, penemu menteri besai enggau parti bukai dalam kerajaan perintah ti setuju pasal pekara nye, endang pekara ke manah.
"Penemu ungkup kerusi ti dipegai Sarawak enggau Sabah mesti dipulaika ngagai nisbah 35 peratus baka ke sebedau tu,endang pekara ke manah.
"Kebuah pia, nisbah Malaysia Timur diatu iya nya 25 peratus laban kerusi ti dipegai Singapura sebedau ninggalka Malaysia lalu diberi ngagai Malaya.
"Sida ti meretika pasal undang-undang ta nemu ubah ba sekeda ungkup Konstitusyen Perintah Besai ti begunaka majoriti dua pertiga ba Parlimen," ku iya.
Ku Karim, nya kebuah nisbah 35 peratus nya beguna amat, nya endang penyaga khas ungkup hak Sarawak enggau Sabah.
“Nitihka nisbah ke diatu, Malaya megai lebih ari dua pertiga ari kerusi,reti nya sida tau ngena chara dikena ngubah konstitusyen ,” ku iya.
Ku iya baru, agih ngempu satu pertiga ari kerusi sementara enda dipadahka, referan sentang nya digaga dalam Sempekat Malaysia 1963 (MA63),Ripot Komiti Entara Perintah (IGC) 1962 enggau Konstitusyen Perintah Besai.