Anda di sini

Tanka pesaka budaya nengah chara ngerikod lalu taruh chara digital

Advertisement

Nengah chara tu pesaka budaya ulih dipeda enggau mayuh tuju bukai ungkup rebak dudi ila, pia ku Abang Johari

Abang Johari nerima tepa pedang iya nya nyadi ke pengering semengat, ti disuaka Jabu seraya disempulang Rentap (kiba). Kelai terima kasih udah bejadi pengawa mandangka Filem Dokumentari Gawai Antu ke diatur ba Muzium Budaya Borneo ditu, kemari. - Gambar Opis Pemadah
Abang Johari nerima tepa pedang iya nya nyadi ke pengering semengat, ti disuaka Jabu seraya disempulang Rentap (kiba). Kelai terima kasih udah bejadi pengawa mandangka Filem Dokumentari Gawai Antu ke diatur ba Muzium Budaya Borneo ditu, kemari. - Gambar Opis Pemadah

“Dokumentari tu iya nya pengawa Datuk Patinggi Jabu sebilik ti mendokumentasyen pengerami tu ambika ulih dijaga dalam medium ti ulih dipeda rebak biak raban bansa Iban enggau raban bansa bukai.”

Datuk Patinggi Tan Sri Abang Johari Tun Openg
Premier Sarawak

Dikarang Rengenyan Labang

KUCHING: Etnik di Sarawak diperansang ngetanka pesaka budaya nengah chara ngerikod lalu taruh ngena chara digital awakka ulih dipeda rebak dudi.
Premier Sarawak,Datuk Patinggi Tan Sri Abang Johari Tun Openg madah etnik bukai ulih neladan Filem Dokumentari Gawai Antu ti didokumentasyen sida Datuk Patinggi Tan Sri Alfred Jabu Numpang enggau Tan Sri Dato Sri empiang Jabu sebilik.
“Dokumentari tu iya nya pengawa Datuk Patinggi Jabu sebilik ti mendokumentasyen pengerami tu ambika ulih dijaga dalam medium ti ulih dipeda rebak biak raban bansa Iban enggau raban bansa bukai.

“Tu pengawa besai ti patut dichunto mayuh bengkah etnik kitai di Sarawak dikena ngetanka pesaka budaya diri empu enggau serius nengah chara ngerikod sereta naruh ngena chara digital ke ulih diambi lalu awakka dipeda enggau mayuh tuju bukai ungkup rebak dudi ila.

“Aku dipadahka Datuk Patinggi Jabu, orang Iban ngatur Gawai Antu ti nyelai kena meri basa, terima kasih enggau basa ke pemadu tinggai ari kaban belayan ke agi idup ti ngenang pemanah ke udah digaga aki ini, kaban belayan ngelama tu dikena nentuka pengidup ke meruan agi enggau patut ungkup orang ke nampung tauka pengudah sida,” ku iya.
Abang Johari madah munyi nya lebuh ke bejaku seraya bejadi pengawa mandangka Filem Dokumentari Gawai Antu ke diatur ba Muzium Budaya Borneo ditu, kemari.

“Aku dipadahka kena nyendiaka diri (ngerami Gawai Antu) diatur enggau penuh adat (ritual) nitihka sistem pengarap Iban, ti engka bebida ba entara sesebengkah menua,” ku iya.

Abang Johari madah, dokumentari nya mulaika pengingat iya lebuh seduai iya Datuk Amar Jumaani Tun Tuanku Bujang dikangau ngulu pengerami Gawai Antu ba rumah panjai Gensurai, Layar, Betong kena 22 Disember 2018.
Iya madahka diri agi ingatka Gawai nya lalu mayuh orang datai sereta berami gaga ati maya pengerami nya.
“Tang nama ti narit ati aku baka ke dipeda aku iya nya, pengerami nya udah nyadi pelasar ti meri empas intraksyen enggau entara budaya, laban raban bansa Iban ari rumah panjai enggau endur bukai, nyengkaum ari menua luar , enggau raban bansa bukai sama datai ngerami pengerami Gawai tu, enggau meri basa ngagai aspek penyelai raban bansa Iban.
Dokumentari tu ku iya, nyendiaka multimedia siti medium ke beguna kena mandangka aspek sosio-budaya ti mayuh di Sarawak ambika ulih dipeda mensia mayuh nyengkaum ba luar menua Sarawak.

Pengerami nyelai raban bansa Iban tu, iya nya kaul ti amat beguna ngagai Sarawak enggau dunya luar, lalu dalam pekara tu, pengerami orang asal ari mayuh raban etnik ari Sarawak nyendiaka jalai ke beguna ngagai pelajar budaya ungkup bakih kitai ari menua luar, ku iya.
 
“Bejadi rasmi mandangka dokumentari pagi tu (kemari), engka ti keterubah ari inisiatif ti baka tu ari Muzium Budaya Borneo bekunsi  enggau mensia mayuh sereta dunya kelebih agi ba sukut pemanah budaya raban bansa Iban tu.

“Semua rumah panjai enggau peranak di Gensurai Layar, Betong patut meri terima kasih laban mujur ngatur pengerami ti baka tu lalu diatu didokumentasyen sereta dijaga dalam format digital bekualiti tinggi,” ku iya.

Pengerami tu kemari bisi digulu bini iya, Puan Sri Datuk Amar Juma’ani Tun Tuanku Bujang, Sapit Premier Sarawak Datuk Amar Douglas Uggah Embas enggau bini iya Datuk Doreen Mayang, Speaker Kunsil Negeri Tan Sri Datuk Amar Awang Asfia Awang Nassar enggau bini iya Puan Sri Datin Amar Fatimah Mohamad Iskandar, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah enggau bini iya Datin Sri Zuraini Jabbar enggau Sapit Menteri Pemansang Raban Nembiak, Lumba enggau Main enggau Pemansang Orang Dagang Datuk Gerald Rentap Jabu, enggau Datuk Patinggi Tan Sri Alfred Jabu Numpang sereta bini iya Tan Sri Dato Sri Empiang Jabu.

Advertisement