Dokumentari tu dirikod maya pengerami Gawai Antu ba rumah panjai iya Gensurai dalam bulan Disember taun 2018
Dikarang Rengenyan Labang
KUCHING: Filem Dokumentari Gawai Antu deka nyadi ke kelai kelebih agi ngagai raban bansa Iban enggau ngagai selampur Sarawak.
Datuk Patinggi Tan Sri Alfred Jabu Numpang madah, filem dokumentari tu dirikod maya pengerami Gawai Antu ba rumah panjai iya Gensurai, Layar Bagi menua Betong dalam bulan Disember 2018.
“Filem Dokumentari Gawai Antu ti dipenyadi Premier Sarawak Datuk Patinggi Tan Sri Abang Johari Tun Openg tu nyadi kelai ti pemadu beguna kelebih agi ngagai raban bansa Iban enggau ngagai selampur Sarawak.
“Tu ngelaika terima kasih ti chukup tulin ari perintah Sarawak Gabungan Parti Sarawak (GPS) perintah Sarawak nyaup sosiobudaya tetiap raban bansa enggau lebih nyengenda, iya nya manifestasi runding tebuka enggau basa ari Premier Sarawak ti seruran ibuhka rayat.
“Filem dokumentari ti ngena format resolusyen tinggi, kena nyapai juluk sereta objektif sida ti deka ngaga dokumentasyen enggau ngerikod pengerami Gawai Antu ambika bisi ditaruh lalu dijaga sereta nyadika referan pelajar enggau antropologi jemah ila,” ku iya.
Jabu madahka pekara nya dalam jaku pengelalu pengerami bejadi mandangka Filem Dokumentari Gawai Antu ke diatur ba Muzium Budaya Borneo ditu, kemari.
“Muzium Budaya Borneo ti ikonik sereta strategik di Kuching, iya nya palan ke engkeman alai bejadika Filem Dokumentari pasal Gawai Antu, laban baka nama iya muzium nyendiaka palan mandangka kereban enggau artifak mayuh macham budaya ti dikemerankan mayuh bansa di Borneo,” ku iya.
Bejaku baru iya madah, kitai orang Iban chukup bebasaka pemaik enggau pengelantang sereta kerejasama ambika ulih idup begulai enggau pengan diri ke nyadi rayat Sarawak.
Iya madahka diri seruran ngasai sereta meri terima kasih ba pemayuh pengasai ari pemanah bebakih enggau penyerakup ke tegap, sama bebasaka pangan diri sereta ulih nerima penemu pangan diri, enda ngira bansa enggau jalai pengarap di Sarawak ke dipuji enggau dikemegahka temuai ari menua luar.
“Kami sebilik pechaya nya beguna amat lalu patut dikemeran enggau dikemeratka dalam kaul sosiobuadaya enggau pemaik pengelantang kitai sama mensia,” ku iya.
Dulu ari nya Produser enggau Direktor Filem Dokumentari Gawai Antu, Loo Shun Ming bejaku madahka filem dokumentari nya nyeritaka pasal pekara ti ditemegah raban bansa Iban.
Tu mega nyeritaka pasal dunya mitos dalam kampung Borneo, lalu ba pengujung iya, cherita pasal basa enggau penyerakup entara ti idup enggau ti mati, ku iya.
“Dulu kelia, orang Iban dikelala nyadi pengayau ti dikenangika. Sehari tu, dalam siti chara, sida agi ngayau, tang sida ngayau orang ke betul kena nampung cherita sida.
“Aku enggau tim aku gaga ati dikayau Datuk Patinggi Alfred Jabu enggau Tan Sri Empiang Jabu ngaga projek ti chukup besai reti tu. Sida udah meri sukung ti tegap enggau nadai natak kreativiti dalam semua ke digaga kami, ti pemadu manah.
“Ngagai peranak rumah panjai Gensurai, filem tu ungkup kita,” ku iya seraya madahka begunaka timpuh 14 hari ngambar di Betong enggau ba Rumah Panjai Gensurai, lalu 10 hari agi ngambar sekeda 'b-roll'.
Pengerami tu kemari bisi digulu bini Premier Sarawak, Puan Sri Datuk Amar Juma’ani Tun Tuanku Bujang, Sapit Premier Sarawak Datuk Amar Douglas Uggah Embas enggau bini iya Datuk Doreen Mayang, Speaker Kunsil Negeri Tan Sri Datuk Amar Awang Asfia Awang Nassar enggau bini iya Puan Sri Datin Amar Fatimah Mohamad Iskandar, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah enggau bini iya Datin Sri Zuraini Jabbar enggau Sapit Menteri Pemansang Raban Nembiak, Lumba enggau Main enggau Pemansang Orang Dagang Datuk Gerald Rentap Jabu, enggau Tan Sri Dato Sri Empiang Jabu.