SRI AMAN: Rayat mesti sama singkang enggau perintah enti sida begunaka pemansang belama kena nentuka sitak enda tinggal ari arus pemansang ke diatu.
Sekretari Politik Premier Sarawak, Datuk Seri Doris Sophia Brodie madah,nadai kebuah rayat ngenggaika perintah enti sida dekaka pemansang ba sitak terus dipejalaika.
Ku iya, perintah seruran beratka pengelantang pendiau rayat nyengkaum ngemansangka raban bansa di menua pesisir ngena perengkaguna baka bekal eleterik, bekal ai beresi enggau jalai alun ke dibelakin.
“Tu mih pemansang ke digaga perintah nyengkaum infrastruktur ke bukai baka balai mayuhguna, jematan, projek jalai nuju genturung pendiau enggau ke bukai,” ku iya.
Iya bejaku munyi nya maya 'Program Ngopi' begulai enggau peranak Rumah PanjaiLichang Batang, kampung Entawa Asal, Sri Aman ditu kemari.
Ku iya baru, rayat mega patut beterima kasih ngagai semua pemansang ti udah digaga perintah di negeri tu.
“Konsep beterima kasihngagai perintah mega mesti diterenak ba raban bansa kitai ambika rayat temegahka bala ketuai ti udah mayuh mai pemansang ngagai negeri kitai Sarawak tu,” ku iya.
Iya mega ngarapka rayat terus meri sukung ke tegap ngagai perintah kena nemtuka pemansang nya ulih diteruska.
“Kerejasama entara rayat enggau perintah patut amat ditegapka agi kena nen tuka negeri kitai tu terus maju jemah ila,” ku iya.