KUCHING: Penyampau dagang entara Sarawak enggau China nambah ngagai RM27.045 bilion dalam taun 2021 enggau penyampau eksport RM18.633 bilion.
Premier Sarawak Datuk Patinggi Tan Sri Abang Johari Tun Openg madah, penyampau nya bepelasarka statistik ari Op is Menteri Dagang Antarabansa, Industri enggau Pemeranak Puku (MINTRED) ke alai eksport Sarawak ke China bekaul enggau batang komoditi nyengkaum gis asli lela (LNG) enggau minyak mineral.
Penyampau import Sarawak ari China ba taun ke sama semina RM8.4 bilion, ku iya.
"Ari perati MINTRED, penyampau dagang Sarawak enggau China nambah RM27.045 bilion dalam taun 2021.(Penyampau) eksport kitai ke China iya nya RM18.633 bilion.
"(Penyampau) import kitai enda mayuh, semina RM8.4 bilion. Engka China bisi penyampau tubuh ke mayuh, penyampau eksport mayuh agi, penyampau tubuh di Sarawak mimit, (maka) lalu penyampau import mega mimit.
"Taja pia, kitai bisi pemansut lalu aku pechaya ada banyak Duta Khas Menteri Besai Ke Republik Rakyat China, Datuk Seri Tiong King Sing deka majak ngelakuka Sarawak ke China," ku iya lebuh bejaku bejadika Pengerami Makai Lemai Beserimbai enggau Ke-48 Taun Serakup Pengeksport Pengimport Dagang Kuching-China (KCTIEA) Udah ditumbuhka ditu, malam ensanus.
Pengerami makai lemai nya berambaika leka jaku 'Bersama Kita Mencipta Kecemerlangan' idiatur dikena ngerami Ke-48 kaul diplomatik entara Malaysia enggau China sereta ngintu pengerami musim luruh.
Ku Abang Johari, kaul dagang entara Malaysia enggau China udah meri bantu besai ngagai pemansang ekonomi menua, nyengkaum Sarawak.
Ku iya, mayuh projek infrastruktur di Sarawak dikemansangka begulai enggau entara kompeni negeri tu enggau kompeni ari China nyengkaum projek ngaga Jematan Batang Lupar.
"Nya kebuah, aku amat ngarapka kaul dagang entara Malaysia enggau China majak ngerembai lalu nyadi penarak ngagai Sarawaknyadi negeri maju manggai ba taun 2030," ku iya.
Dulu ari nya, Konsulat Republik Rakyat China di Kuching Xing Weiping madahka Sarawak entara kaban dagang ke pemadu atas China ungkup setengah taun keterubah taun tu.
"Tentu Perintah Sarawak bejalaika pengawa ke beguna amat dalam pemansang ekonomi enggau dagang entara China enggau Malaysia kelebih agi Sarawak,"ku iya.
Sama bisi ngulu pengerami nya,Sapit Premier Sarawak Datuk Amar Awang Tengah Ali Hasan, Kaban Kunsil Negeri (ADUN) Batu Kitang Lo Khere Chiang ngarika Sapit Premier Sarawak Dato Sri Dr Sim Kui Hian, Duta Khas Menteri Besai Ke Republik Rakyat China Datuk Seri Tiong King Sing, Presiden KCTIEA Datuk Yii Ming Tang enggau Chairman pengatur pengerami makai lemai nya, Dato Sim Kiang Chiok.