SARATOK: Peranak rumah panjai mesti ngenegapka sistem pengelikun ba kandang menua sida kelebih agi bekaul enggau penanggul penusah angus.
Kaban Kunsil Negeri Krian Friday Belik madah,patut amat anang ilap ba pekara kena nentuka tikas pengelikun sesebuah rumah panjai seruran likun kelebih agi bekaul enggau isu penusah ke bepun ari penusah angus.
"Sepanjai taun tu, dalam sitak (DUN) Krian udah dua kali nyadi penusah angus rumah panjai dirikodka.
"Penusah tu ngujungka peranak rugi besai kelebih agi bekaul enggau reta tengkira enggau endur diau,"ku iya lebuh ke bejaku maya Program Bomba Komuniti enggau Ketuai Begulai enggau Rayat ba Rumah Nyueok Sang,Nanga Maras, Krian ensana.
Sama bisi ngulu pengerami nya, Pemangku Sekretari MDS Liam Entili, Ketuai Balai Bomba enggau Penyah Penusah Saratok Mohd Shukor, staf MDS enggau bala ketuai raban bansa ba kandang menua nya.
Program nya diatur Opis Kaunsil Pelilih Saratok (MDS) sereta digulu urung 200 iku peranak ba kandang men ua nya.
Ku Friday, empas ari ari penusah tu besai amat ngagai peranak ke kena tuntung nya sereta meri empas besai ngagai ekonomi enggau sosial sida.
"Ari sukut pengelikun,sida meati anang ilap ba pekara ti tau ngujungka penusah angus nyadi sereta beratika mayuh bengkah sukut nitihka pemadah ari bomba.
"Tebal agi penusah angus nyadi bepun ari pengilap baka enda madam tauka beratika perengka dapur maya enggau pengudah nyumai, sut wayar ketegal nyambung wayar elekterik ti enda sah tauka kelalu mayuh ngena soket enggau sekeda isu bukai," ku iya.
Iya dekaka peranak rumah panjai amat ngemeratka pekara nya sereta beratika chara kena nyeliah penusah angus baka sururan nentuka dapur selamat, gis enda pantis sereta madamka perengka dikena nyumai ba dapur, anang sepeneka nyambung wayar elekterik tauka enda sah sereta nentuka tetiap rumah panjai bisi kereban dikena ngerara api.
"Kami ngarapka pekara seruran dikemeratka semua.
"Skelimpah ari nya, Ketuai Raban Bansa enggau Ketuai Genturung Pendiau (KMKK) tau ngangauka bomba ke rumah panjai sida meri licha penyedar penusah angus tauka pekara bukai ti bekaul kena nentuka peranak rumah pan jai bisi penemua bekaul enggau penusah tu," ku iya.
Ku Friday, sida seruran meri sukung ngagai pengawa ngatur programke baka nya kelebih agi kena nentuka peranak rumah panjai lalu penusah angus rumah panjai ulih diseliahka.
Ba pengerami nya, iya ngungkupka RTP 2023 RM200,000 enggau RM5,000 ngagai Komiti Pemansang Pengelikun Genturung Pendiau (JKKK) Rumah Nyueok enggau Biro Indu rumah panjai nya.