Tu nyengkaum belanja perengka pengangkut, pemakai, bayar hotal kuarantin enggau ke bukai maya pandemik COVID-19
“Nya mega nyengkaum belanja perengka pengangkut, pemakai, bayar hotel dikena kuarantin, sepital meda, beperesa enggau ke bukai ti bekaul enggau servis nuchuk vaksin nyengkaum nyendiaka fasiliti sukung berubat COVID-19.”
Datuk Amar Douglas Uggah Embas
Chairman JPBNS
SIBU: Komiti Mutarka Penusah Ngenyit Nengeri Sarawak (JPBNS) udah melanjaka sepenyampau RM300 juta dikena bejalaika operasyen servis vaksinasyen COVID-19.
Chairman JPBNS Datuk Amar Douglas Uggah Embas madahka, belanja nya mega nyengkaum nyendiaka fasiliti sukung berubat COVID-19.
“Tu ukai ungkus dikena meli vaksin laban vaksin diberi enda bebayar ari perintah besai.
“Tu iya nya dikena operasyen servis meri vaksin COVID-19.
“Nya mega nyengkaum belanja perengka pengangkut, pemakai, bayar hotel dikena kuarantin, sepital meda, beperesa enggau ke bukai ti bekaul enggau servis nuchuk vaksin nyengkaum nyendiaka fasiliti sukung berubat COVID-19,” ku iya lebuh ti ditemu pengarang berita pengudah datai maya Pengerami Ngenang Basa Raban Terabai Menua COVID-19 Zon Tengah di sebuah hotel tebilang, bedau lama ti udah.
Sama bisi datai iya nya Sapit Premier Sarawak Dato Sri Dr Sim Kui Hian, Menteri Ba Opis Premier Sarawak Datuk John Sikie Tayai, Sapit Menteri ba Opis Premier Sarawak Jafferson Jamit Unyat, Sapit Menteri Pekara Korporat enggau Unit Komunikasyen Perintah Sarawak (UKAS) Datuk Abdullah Saidol, Sapit Menteri Pelajar, Inovasyen enggau Pemansang Pengelandik I Dr Annuar Rapa'ee, Sapit Sekretari Perintah Nengeri Datu Ik Pahon Joyik, Pesuruhjaya Polis Sarawak Datuk Mohd Azman Ahmad Saperi enggau bala temuai dipebasa ke bukai.
Uggah ti mega Sapit Premier Sarawak madah, bejalaika servis vaksinasyen di nengeri tu ukai nya siti pekara ti nyamai laban mayuh kandang menua ti mar deka dilawa laban ti jauh ba menua pesisir.
“Ambika chunto bejalaika servis vaksinasyen di kandang menua ulu Baram, ulu Batang Rajang, kandang menua ti mit enggau jauh di ulu ke begunaka perau, bilun engkabang, minyak deka ngagai kandang menua nya,” ku iya nerang.
Beserimbai enggau nya, iya mega madahka pengaga ati sereta beterima kasih ngagai Premier Sarawak Datuk Patinggi Tan Sri Abang Johari Tun Openg ke udah ngemendarka agih belanja nya.
Nitih ku iya, pekara ti dikemerat iya nya deka nyelamatka nyawa mensia mayuh enggau nuchuk vaksin ngagai seberapa mayuh orang dalam timpuh ti lengkas.
“Nyema nadai agih belanja sepenyampau nya nyangka program vaksinasyen deka nyadi lubah lalu tinggal.
“Tang ketegal penyiru Premier kitai, Sarawak ngerikodka pengawa nuchuk vaksin ti pemadu jampat di menua tu,” ku iya nyemetak.
Dalam pekara bukai, Uggah mega ngenataika pengirau ati diri ngagai individu ti ulih betuchuk dos penyungkak kedua ti semina ngerikodka 7.1 peratus di nengeri tu, ke lalu terus minta sida tu ngambika lengkas betuchuk dos nya.
Iya mega enda ngenggaika nyangka bisi sekeda individu ti agi kakang ati deka betuchuk laban irauka enggau komplikasyen nya.
Nya alai, iya ngelalau raban tu ngambika enda kelelu irau lalu seruran ngemeratka pengelikun diri.
Kelimpah ari nya, iya mega ngelalau mensia mayuh ti bisi ngasaika simptom tabin enggau angat isi ngambika beperesa kediri tauka lengkas ngagai sepital ti besemak.
“Diatu di sepital, kitai udah bisi ubat 'antiviral' dikena ngubat COVID-19 lalu nya deka diberi ngagai sida ti tau sereta begunaka nya,” ku iya nambah.
Lebuh ke ditanya bekaul enggau gaya COVID-19 di nengeri tu, iya madahka penyampau nya deka nurun niki tang madahka penyakit tu endang agi bisi.
“Igi penyakit tu agi bisi dalam kitai tang kitai ulih idup baka selama laban mayuh populasyen di nengeri tu udah nerima vaksinasyen diri tang mesti bejejaga,” ku iya nambah.
Ba pengerami nya, Uggah mega udah nyuaka setipiki ngenang basa ngagai ejensi ti bekaul di zon tengah ti udah bejalaika tanggungpengawa nyadi raban terabai menua ngelaban COVID-19 maya timpuh pandemik nyin tadi.