Anda di sini

Sektor betanam betupi moden deka terus dikemansang di Sri Aman

Advertisement
Abang Johari ti disempulang (duduk, ari kiba) Elvis, Uggah sereta Dr Sim (duduk, kanan) begambar enggau sekeda orang ke bisi datai ngulu Pesta Benak Sri Aman 2022 di Sri Aman, kemari. -Gambar Penerangan
Abang Johari ti disempulang (duduk, ari kiba) Elvis, Uggah sereta Dr Sim (duduk, kanan) begambar enggau sekeda orang ke bisi datai ngulu Pesta Benak Sri Aman 2022 di Sri Aman, kemari. -Gambar Penerangan

Perintah nengeri, perintah besai deka bejalaika pemansang begulai di sitak tu ti nyadi pengeluar padi menua

"Lalu berindik Sri Aman udah dikelala nyadi siti agi kandang endur ngeluarka padi ti diguna di serata menua (Malaysia), reti nya kitai deka ngemansangka infrastruktur ti begunaka belanja ke besai.

Datuk Patinggi Tan Sri Abang Johari Tun Openg
Premier Sarawak

Dikarang Rengenyan Labang

KUCHING: Perintah negeri enggau besai deka bejalaika pemansang begulai kena ngemansangka betanam betupi moden ba kandang menua Sri Aman ke udah dikelala nyadi pengeluar padi menua.

Premier Sarawak, Datuk Patinggi Tan Sri Abang Johari Tun Openg madahka, kena nyapai juluk nya entara dipejalaika perintah negeri neruska pengawa ngaga Jematan Batang Lupar ke-2, ti deka nyambungka Sri Aman terus ke jalai besai kedua nyentuk ke jalai tebing tasik enggau mega terus ke Betong.

Iya madahka enggau pemansang infrastruktur baka jematan nya ke deka digaga, nya deka muka kandang endur ke udah bisi ba alai nya nyadi siti endur ngemansangka sektor betanam betupi ti moden.

"Lalu berindik Sri Aman udah dikelala nyadi siti agi kandang endur ngeluarka padi ti diguna di serata menua (Malaysia), reti nya kitai deka ngemansangka infrastruktur ti begunaka belanja ke besai.

"Aku udah berunding enggau perintah besai ba pengawa ngemansangka kandang endur nya enggau mega duit ari perintah negeri, reti nya pemansang begulai di entara perintah besai enggau negeri.

"(Dato Sri) Dr. Stephen Rundi ke nyadi pemesai (Menteri Betanam Betupi Moden enggau Pemansang Kandang Menua) kitai berunding enggau (Datuk Seri) Dr. Ronald Kiandee (Menteri Betanam Betupi enggau Industri Pemakai Malaysia), bekaul enggau padi kitai ditu," ku iya.

Abang Johari nyebut pekara tu lebuh iya bejaku seraya bejadi Pesta Benak Sri Aman 2022 di Sri Aman, kemari.

Bejaku baru iya madahka Sarawak deka ngubah chara betanam betupi setipak enggau deka ngubah baru nama Opis Menteri Betanam Betupi Moden enggau Pemansang Kandang Menua, ti lebih fokus ngagai industri pemakai negeri.

Iya bepenemu opis menteri tu ukai patut agi ngayanka gambar orang betanam betanam betupi ti ngena cangkul enggau beselapuk.

"Kebendar betanam betupi iya nya sektor ti beguna ke ngena chara baru nyengkaum chara teknologi digital ba pengawa ngeluarka pemakai, sereta tu nunjukka gaya kitai jemah ila  ari sukut industri pemakai.

"Aku enggau Dr. Rundi sereta bala pemesai ke bukai bisi polisi baru, tu dipadahka aku ila enti  semua infrastruktur iya udah ditembuka kena kitai ngemansangka sektor betanam betupi," ku iya seraya madah tu pekara ti dikemeratka kelimpah ari sektor servis enggau sektor dagang temuai.

Dulu ari nya Abang Johari madahka perintah negeri deka terus nambahka pemansang infrastruktur kena ngemanahka agi landskap Waterfront Sri Aman.

"Kitai deka neruska projek waterfront tu ngena ungkup belanja ke deka diberi kena nambahka perengka guna Waterfront nyentuk ngagai siti endur ke ulih alai kitai mai ikan-ikan kitai ke Sri Aman," ku iya.

Sama bisi datai ba pengerami bejadi Pesta Benak Sri Aman 2022, Sapit Premier Sarawak Datuk Amar Douglas Uggah Embas enggau Dato Sri Dr Sim Kui Hian, Menteri Dagang Temuai, Seni enggau Budaya Malaysia Datuk Seri Nancy Shukri,Menteri Betanam Betupi Moden enggau Pemansang Kandang Menua Dato Sri Dr. Stephen Rundi Utom, Sapit Menteri Pelajar, Inovasyen enggau Pemansang Pengelandik Datuk Francis Harden Hollis ti nyadi menteri megai tanggung pengawa pengerami nya, Sekretari Perintah Negeri Dato Sri Mohamad Abu Bakar Marzuki, Chairman Komiti Pengatur Pesta Benak Sri Aman 2022 Elvis Didit enggau pemesai ke bukai.
 

Advertisement