Laban meri pemadah ke betul bekaul operasyen, dagang,bantu ekonomi sesebuah kompeni kelebih agi maya COVID-19
"Kami deka majak ngenanka kaul manah enggau media sereta nyingkang ke mua sekalika di Bintulu enggau negeri Sarawak,"
Aslam Khan Mohater Khan
Managing DirektorASEAN Bintulu Fertilizer (ABF) Sdn Bhd
BINTULU: Pengawa ti dipejalaika media beguna amat sereta dibasa laban meri pemadahka betul bekaul enggau operasyen,dagang enggau bantu ekonomi sesebuah kompeni nyengkaum mensia mayuh be sesebngkah endur kelebih agi dalam timpuh ti mar mutarka pandemik COVID-19.
Managing Direktor ASEAN Bintulu Fertilizer (ABF) Sdn Bhd Aslam Khan Mohater Khan madah,baka ke ditemu semua,kenyau ari beberapa taun ke udah, bemacham pemar besai udah ditengah maya COVID-19 ke alai pandemik nya udah meri empas ngagai semua orang dalam mayuh bengkah gaya.
Nya alai ku iya,taja pan pandemik agi bisi tang pegidup belinsur pulai normal berindik ari penyabar enggau pengepuh semua orang sekumbang timpuh, ti lalu mandangka pengeliat ati enggau penyiru semua.
"Ketegal nya,media enggau Petronas udah ngatur mayuh program kenyau ari dua taun ke udah kena mantu komuniti (mutarka pandemik) nyengkaum vaksinasyen," ku iya lebuh ke bejadi ba Pengerami Makai Lemai Jaringan Petronas-Media Bintulu 2022 ba Hotel Margherita Plaza Bintulu, malam ensana.
Ketegal nya ku iya,iya meri terima kasih ngagai semua media di Bintulu laban terus meri sukung ngagai kompeni nya kelebih agi ba maya ke mar nya.
"Kami deka majak ngenanka kaul manah enggau media sereta nyingkang ke mua sekalika di Bintulu enggau negeri Sarawak," ku iya seraya madahka program ke baka nya udah lama enda diatur ketegal COVID-19.
Berebak enggau nya, iya meri terima kasih ngagai komiti ke bisi enggau ngatur aktiviti tanggungpengawa rama korperat (CSR) enggau sekeda projek baru ti benung dipejalaika di Bintulu.
Ambika chunto, minggu siti nyin tadi sekeda aktiviti besai diatur di Bintulu baka penemuai Kaunsil Direktor enggau Chairman Petronas nyengkaum Premier Sarawak Datuk Patinggi Tan Sri Abang Johari Tun Openg.
"Ba kami, sukung (media) mai penatai kompeni kami (ABF) amb ika dipebasaka peranak Sarawak ba pasar Bintulu lalu kami komited nikalka nya ngagai mensia mayuh ba alai kami beroperasiyen sekalika di Bintulu, Miri enggau negeri Sarawak," ku iya.
Sama bisi ngulu pengerami nya, bala ketuai pengereja pangawa kanan opis Petronas Sarawak, ABF, Malaysia LNG di Bintulu enggau Miri.