Anda di sini

Ngemendarka 35 peratus ari 222 sitak Parlimen pekara ti chukup signifikan: Nanta

Advertisement
 

Kami nguji mulaika posisi nya baru laban beguna amat kena ngetanka konsep 'check and balance' ba Parlimen

"Sarawak enggau Sabah patut bisi lebih ari 1/3 sitak Parlimen baka ke bisi dalam MA63, iya nya pelasar maya numbuhka Malaysia”

Dato Sri Alexander Nanta Linggi 
Menteri Dagang Dalam Negeri enggau Pekara Penguna


Dikarang Rengenyan Labang 

KUCHING: Pengawa deka ngemendarka baru 35 peratus ari 222 sitak Parlimen ungkup Sarawak enggau Sabah pekara ti chukup signifikan sereta beguna amat kena ngetanka konsep 'check and balance' dalam Parlimen.

Menteri Dagang Dalam Negeri enggau Pekara Penguna Dato Sri Alexander Nanta Linggi madahka, nya konsep asal maya numbuhka Malaysia ba taun 1963 iya nya Singapura, Sarawak enggau Sabah bisi lebih mimit 1/3 sitak ba Parlimen.

"Sarawak enggau Sabah patut bisi lebih ari 1/3 sitak Parlimen baka ke bisi dalam MA63, iya nya pelasar maya numbuhka Malaysia.

"Diatu kami nguji deka mulaika posisi nya baru. Tu signifikan sereta beguna laban nyema bisi pengeran deka ngubah konstitusyen ti meri empas ngagai Sarawak enggau Sabah, maya nya Semananjung enda ulih ngereja kediri," ku iya ti mega Sekretari Besai Gabungan parti Sarawak.

Kaban Parlimen Kapit tu dirandau raban pengarang berita pengudah iya ngulu program nutup 'Stakeholder Engagement Workshop Score- Access Road to Tunoh, Kapit' ti diatur ba Auditorium LCDA, Menara LCDA, The Isthmus ditu,kemari.

Nitihku iya,diatu Sarawak enggau Sabah enda lebih ari 1/3 sitak parlimen, lalu nyema ulih kontistusyen nya diubah baru ngagai konsep asal, pemutus ke digaga ukai pemutus kediri.

Nya alai, enda ngira nama pemutus bekaul enggau ubah konstitusyen lebih ari 2/3 nya digaga Semenanjung  kediri, ku iya.

"Taja pia, tu ukai deka betapat tauka besemekih enggau Semenanjung, Sabah enggau Sarawak, tu pasal deka ngetanka chara ti ngena konsep 'check and balance', iya nya pelasar maya kitai numbuhka Malaysia. Kitai patut pulai baru ngagai posisi nya," ku iya ti mega Sekretari Besai Parti Pesaka Bumiputera Bersatu.

Nitihka ripot Bernama ensanus ( 8 September),Aum Kaunsil Khas Sempekat Malaysia 1963 (MKMA63) udah ngemendarka chara ngambi baru 35 peratus ari 222 sitak Parlimen ungkup Sabah enggau Sarawak.

Menteri ba Opis Menteri Besai (Pekara Sabah enggau Sarawak) Datuk Seri Dr Maximus Ongkili madahka isu nya dikerandau enggau silik sereta dikemendarka ba aum kelima Kaunsil Khas nya, ti bechairmaka Menteri Besai Datuk Seri Ismail Sabri Yaakob ba Putrajaya.

"Taja pan lebih mayuh (sesi) sama enggau ngatur dipejalaika bekaul enggau isu tu, kelebih agi ba raban pengaga enggau pengemeran undang-undang ti gawa di Borneo," ku iya dalam penerang.

Enti nitihka itung diatu, 166 tauka 75 peratus ari 222 sitak Parlimen iya nya di Semenanjung Malaysia, lalu laluh 25 peratus tauka 56 sitak ungkup negeri-negeri Borneo, iya nya Sarawak (31) enggau Sabah (25).

Endorsmen MKMA63 nya deka meri peluang ngagai Sabah enggau Sarawak ngembuan 78 ari 222 sitak.
 

Advertisement