BINTULU: Kaban Parlimen Puncak Borneo, Datuk Willie Mongin (gambar) enggai madah pasal sekalika iya agi ngenanka kerusi maya Pengawa Bepilih Besai Ke-15 (PRU15) tu ila.
Ditanya sekalika iya agi ngenanka kerusi ti dimenang iya maya PRU 2018 nya,saut iya: "Terima kasih laban nanya tanya tu ngagai aku, tanya ke baka tu deka disaut aku enti udah datai ba maya iya ila."
"Baka ke dipeda kita diatu, aku enggau bakih bukai dalam PBB (Parti Pesaka Bumiputera Bersatu), nyadi kami 'seati sepenemu'," ku iya.
Iya nyebut nya nuju Sapit Menteri Betanam Betupi Moden enggau Pemansang Kandang Menua (Pemansang Kandang Menua) Sarawak Martin Ben ti duduk ba sepiak iya maya aum media pengudah bejadi program nya ditu, ensanus.
"Kami deka meraka nengah jembatan enti kami udah datai ba nya," saut iya lebuh ke ditanya baru sekalika iya ngelempaika agi dichalunka ungkup kerusi Puncak Borneo maya PRU15 ba Presiden PBB ke mega Chairman Gabungan Parti Sarawak (GPS) Datuk Patinggi Tan Sri Abang Johari Tun Openg.
Willie diterima nyadi kaban PBB dalam bukan Ogos taun itu tadi engagu nadai sebarang penetap.
Iya udah menang ba kerusi Parlimen Puncak Borneo nengah tikit Parti Keadilan Rakyat (PKR) maya PRU 2018,sebedau ningkilka diri ari parti nya maya krisis politik ke diberi nama 'Langkah Sheraton' dalam taun 2020 ti ngujungka perintah besai Pakatan Harapan (PH) tumbang.
Willie nyemetak madahka iya semina 'diengkah' dalam Parti Bersatu Malaysia (BERSATU) ti betuaika ex- Menteri Tan Sri Muhyiddin Yassin s pengudah iya ninggalka PKR tang enda nyemilik parti nya.
Puncak Borneo (sebekela enggau nama Mambong) iya nya kuta kering PBB, tulang belakang GPS berengkah ari kerusi nya ditumbuhka dalam taun 1999.