Ba renggat negeri diatu semina udah bisi Kaunsil Pemansang Tumu Nembiak Mit kelebih, ku Fatimah
"Ungkup renggat Sarawak aku ngasaika manah agi enti kitai ngaga siti Kaunsil ( Special Needs Council kediri empu) ti deka meda ari segi isu pengelantang pendiau, guna khas berengkah ari nembiak mit nyentuk ke besai tuai tauka semua spektrum, sechara holistik sereta tegap”
Dato Sri Fatimah Abdullah
Menteri Pemansang Orang Indu,Nembiak Mit enggau pengelantang Pendiau Raban Bansa
Dikarang Rengenyan Labang
KUCHING: Sarawak udah datai ba maya ke patut bisi 'Special Needs Council' kediri empu, ti beoperasyen sechara holistik ti tegap.
Menteri Pemansang Orang Indu,Nembiak Mit enggau pengelantang Pendiau Raban Bansa Dato Sri Fatimah Abdullah madah, ba renggat Menua diatu iya nya Special Needs Early Intervensyen kelebih ngagai intervensyen tumu.
Ba renggat negeri diatu semina udah bisi Kaunsil Pemansang Tumu Nembiak Mit kelebih agi mekuh ngagai pemansang tumu nembiak mit, ku iya.
"Ungkup renggat Sarawak aku ngasaika manah agi enti kitai ngaga siti Kaunsil ( Special Needs Council kediri empu) ti deka meda ari segi isu pengelantang pendiau, guna khas berengkah ari nembiak mit nyentuk ke besai tuai tauka semua spektrum, sechara holistik sereta tegap.
"Kitai diatu patut meda enggau spesifik nama pekara diguna nembiak mit khas enggau individu khas ti mungkur maya sida biak, nyadi besai tuai enggau nyadi orang tuai. Tu ba semua spektrum, A ngagai Z. Tu pekara ke diaduka kitai nyengkaum 'sesi brainstorming' enggau randau.
"Udah nya baru kitai ulih mai sereta mantai ngagai kabinet negeri awakka ulih dikemendar. Berengkah ari nya (enti udah dikemendar) baru kitai ulih beoperasyen sechara holistik sereta tegap," ku iya seraya madah pansik silik dipejalai awakka ulih fokus ngagai nama pekara ke patut diberi.
Fatimah ngenang silik perambu nya lebuh dirandau raban pengarang berita pengudah iya bejadi 'Gifted Art Exhibition' ke diatur Persatuan Kebajikan dan Pembangunan Bakat Insan Istimewa Kuching (KATSN) ba sebuah palan bebeli barang ditu, kemari.
Bejaku baru Fatimah madah, Sarawak bisi mayuh gerempung ukai dikuasa perintah (NGO) ke ulih bekerejasama kena nentuka Special Needs Council bisi pengawa nyadi siti gerempung ke ulih ngatur semua, enti dibandingka ngatur kediri.
"Ba renggat opis menteri kami ba Bagi Pemansang Tumu Nembiak Mit ti betuaika Puan Salina Bujang, deka nyadi seketriat (Kaunsil), sereta kitai ngangauka beberapa iku nyadi protem komiti ti deka berandauka pasal objektif enggau pekara ke deka difokus, baka ke dipadah aku tadi," ku iya.
Nambahka nya Fatimah, ngenang bekaul enggau KATSN, iya madahka penyulut, pengelandik, penau enggau pemintar ke tinggi ti dikembuan nembiak mit tauka individual ke bisi guna khas patut ulih diperati sereta dibantaika.
Nya alai ku iya, advokasyen patut dipajak awakka mayuh orang nemu pasal nama ke diguna sida ke bisi guna khas, sapa nembiak ke bisi guna khas, nama pemandai tauka penau tauka nama utai ke enda ulih dikereja, enggau nama utai ke diguna sida ke patut difokus.
"Special Needs Council tu mega patut meda pemansang penau tauka pemandai sida, awak nama ke agi bisi dalam nembiak tauka individu bisi guna khas tu ulih dibantai tauka dikerembaika.
"Siti leka jaku ke amat beguna enggau nyadi juluk perintah negeri Sarawak iya nya 'social inclusion' reti nya nyengkaum nembiak mit enggau individu ke bisi guna khas nyadi sebagi ari raban bansa, enda diseliahka tang begulai enggau kitai enda ngira nama aktiviti ke dipejalaika kitai. Ba pengujung iya kitai deka meda sida tu ditegapka pengidup tauka tinggi pendiau," ku iya.
Fatimah lebuh bejadi program nya kemari madah ngungkupka belanja sepenyampau RM20,000 ngagai KATSN.
Kelimpah ari nya, Penyanding Penemu KATSN Dato Sim Kiang Chiok dalam jaku pengelalu madahka diri setuju enggau penyedar mensia mayuh bekaul enggau anak autisme beguna amat.
Iya ngarapka di negeri tu deka ditumbuhka mayuh agi palan pematih ungkup anak autisme belajarka pengelandik baru.
"Di Sarawak, kitai nadai palan pematih (perintah) ungkup orang autisme, ti ngujungka nadai mayuh pilih pengudah sida abis belajar ba renggat sekula sekondari.
"Nambahka nya kitai mega irauka lebuh kitai (api indai) udah nadai ba dunya tu, sapa ti nyaga sida enti nadai diri menyadi mantu sida.
"Nya alai aku gaga ati ninga menteri kitai (Dato Sri Fatimah) bebendar deka nentuka palan ti holistik, iya nya A ngagai Z ungkup anak nyelai pendiau tu. Ari tadika nyentuk ke latih ke lebih tinggi, latih gawa enggau rumah alai maya pinchin," ku iya seraya meri terima kasih ngagai perintah.