Aum betuaika Datuk Amar Douglas Uggah deka diatur alai berandau,mansik pemutus ke pemadu manah ungkup Sarawak
“Taja pan diatu kitai enda ulih enggai ‘idup begulai’ enggau virus nya, tang pengelikun pengerai tetap dikenuluka sereta agi bejejimat”
Dato Sri Dr Sim Kui Hian
Sapit Premier
MIRI: Komiti Mutarka Penusah Ngenyit Negeri Sarawak (JPBNS) deka mansik sereta beratika baru Prosedur Operasyen Standard (SOP) COVID-19 ti udah ditenduka diatu, ke pengelikun pengerai rayat Sarawak, pia ku Premier Sarawak Dato Sri Dr Sim Kui Hian.
Ku iya, taja pan Opis Menteri Pengerai Malaysia (KKM) udah madahka sengkabung idung enggau mulut enda mesti dikena ba endur ke tetutup, tang JPBNS mesti beratika nya dulu laban agi bisi rayat ke dirampit sereta parai ketegal virus nya.
“Taja pan diatu kitai enda ulih enggai ‘idup begulai’ enggau virus nya, tang pengelikun pengerai tetap dikenuluka sereta agi bejejimat.
“JPBNS ti betuaika Premier Sarawak Datuk Amar Douglas Uggah Embas deka baum sereta mansik ungkup gaya di Sarawak awakka bulih pemutus ti patut.
“Berebak enggau nya,kami mega deka ngereja ti pemadu manah ke rayat,” ku iya madah ngagai pengarang berita lebuh ke dirandau maya Festival Pemakani Miri di Dataran Kipas ditu, malam ensana.
Menteri Kesihatan, Khairy Jamaluddin ensanus madahka sengkabung idung enggau mulut enda mesti dikena ba endur ke betutup, ti diteritka tekala nya.
Ngena sengkabung idung enggau mulut dalam begunan enggau endur ke tetutup diatu, pemilih diri empu.
Taja pia, pengempu premis tau nentuka sekalika orang bisi datai nya mesti ngena sengkabung idung enggau mulut tauka enda lebuh tama ngagai premis sida.
Dulu ari nya,lebuh ke ngenang pasal Festival Pemakai Miri nya, Dr Sim madahka nya platform ungkup mensia mayuh di menua nya kelebih agi raban biak, nempa idea sereta meransang sida regas enggau dalam bidang pengawa dagang.
Festival ti diatur Serakup Klan Wu Miri pengelama 10 hari nya, bisi muka lebih 100 buah bansal alai bejual ti nyual bemacham bansa pemakai enggau ai irup menua tu enggau ari mayuh bengkah menua.
Sama bisi ngelawa festival bnya, Menteri Perengka Pengangkut Sarawak Dato Sri Lee Kim Shin enggau Datuk Bandar Miri ke mega ADUN Pujut, Adam Yii.