Anda di sini

Sarawak nyadi pengeluar hidrogen komersial manggai ba taun 2027

Advertisement
Abang Johari (bediri, enam ari kiba) begambar bebala mayuh pengudah ngemataka pengawa nyain sempekat ti disain (duduk, ari kiba) Robert, Sharbini, Hwang Jin-Gu, Yoo Byeong-Og enggau Chong Ju-Seong.
Abang Johari (bediri, enam ari kiba) begambar bebala mayuh pengudah ngemataka pengawa nyain sempekat ti disain (duduk, ari kiba) Robert, Sharbini, Hwang Jin-Gu, Yoo Byeong-Og enggau Chong Ju-Seong.

Nya mega lalu ngamatka visyen nempa negeri tu nyadi ekonomi hidrogen,ku Abang Johari Tun Openg

"Kena nyapai visyen nya, Sarawak benung bejalaika chara ke patut enggau ngatur mayuh inisiatif dikena ngemansangka ekonomi hidrogen Sarawak ti bepelasarka energi ulih dikemaru"

Datuk Patinggi Tan Sri Abang Johari Tun Openg 
Premier Sarawak 

SEOUL: Sarawak ngengkahka diri nyadi pengeluar hidrogen komersial lebuh manggai ba taun 2027 seraya ngamatka visyen nempa negeri tu nyadi ekonomi hidrogen, pia ku Premier Sarawak Datuk Patinggi Tan Sri Abang Johari Tun Openg.

"Kena nyapai visyen nya, Sarawak benung bejalaika chara ke patut enggau ngatur mayuh inisiatif dikena ngemansangka ekonomi hidrogen Sarawak ti bepelasarka energi ulih dikemaru," ku iya.

Iya madahka pekara nya lebuh bejaku ba pengawa nyain Sempekat Pemereti Ati (MoU) entara Sarawak energy, SEDC Energy, Samsung Engineering, Lotta Chemical enggau Posco Holding ba Seoul ditu, kemari.

Juluk MoU iya nya mansik bekal energi ulih dikemaru ungkup Projek Hidrogen Gadung/Amonia di Sarawak, ti dikumbai Projek H2biscus.

Iya meri terima kasih ngagai perintah Korea ti nyendiaka belanja ungkup projek bebilion dolar nya.

"Aku amat temegah sereta gaga ati ngemataka pengawa nyain MoU entara Sarawak Energy, SEDC Energy, Samsung Engineering, Lotta Chemical enggau Posco Holding," ku iya.

Iya meri terima kasih ngagai  Samsung Engineering, Lotta Chemical enggau Posco Holding ti dipadah iya nyadi 'giants' ari Korea Selatan ti beranakka puku sida di Sarawak, laban projek tu ukai semina nempa pemansang ekonomi dua buah menua. tang nyadi projek besai ba serata rantau.

"Aku mega berasai deka jampat meda kerejasama ti ngerembai jauh agi, enggau pelaba nunjukka asil pemansut hidrogen gadung ba skala ti besai keterubah Sarawak ti sedia dieksport, insya-Allah lebuh manggai ba taun 2027," ku iya.

Nambah nya iya madah diri temegah ati laban dua kompeni besai Sarawak: Sarawak Energy enggau SEDC (nengah SEDC Energy) bejalaika tanggungpengawa ti beguna dalam ngemansangka Ekonomi Hidrogen Sarawak.

"Diatu, Sarawak Energy udah ngeluarka Hidrogen gadung ba Integrated Hydrogen Refuelling Facility sida di Kuching , ti dipelaba aku iya nya keterubah di Asia Tenggara.

"SEDC Energy mega berengkah ngasilka Hidrogen Gadung ba stesyen PETROS Multifuel lebuh manggai ujung taun tu, enggau kereban Pemansut Hidrogen Rembus ungkup Autonomous Rapid Transit (ART) kitai lebuh manggai 2024," ku iya.

Sempekat nya disain Ketuai Pemesai Eksekutif (CEO) SEDC Energy Robert Hardin, CEO Sarawak Energy Datu Sharbini Suhaili, CEO Lotte Chemical Hwang Jin-Gu, Senior Executive Vice Presiden POSCO Holding Yoo Byeong-Og enggau Executive Vice President Samsung Engineering Chong Ju-Seong.

Sama bisi ngulu pengawa nya, Sapit Premier Sarawak Datuk Amar Awang Tengah Ali Hasan,Duta Besai Malaysia ke Republik Korea Datuk Lim Juay Jin, Sapit Menteri Energi enggai Penegap Rampa Menua Sarawak Dr. Hazland Abang Hipni enggau Sapit Menteri Dagang Antarabansa, Industri enggau Pemeranak Puku Sarawak Datuk Malcolm Mussen Lamoh.
 

  • oleh
  • Advertisement