KUCHING: Sarawak mesti nyadi pugu Keretas Putih Pengerai (HWP) kena nentuka sistem pengerai ti dikemanah ulih dijapai.
Menteri Pengerai Khairy Jamaluddin madah, nya kebuah negeri tu ti keterubah dipilih iya alai ngatur sesi 'town hall' alai ngumpul penemu sida ke bekaul enggau bidang nyaga pengerai.
"Ukai semina di Sarawak aja tang Sabah enggau semua kandang menua pesisir enggau ulu entigis, nya mih nyadi siti pemar.
"Enti kitai ulih ngagai semua kandang menua tu, HWP tu udah mujur kena nentuka akses enggau ekuiti endang sebengkah pekara ti dikemeratka kitai.
"Aku meri jamin tu ukai sesi pengawa bepilih. Tu sesi alai kitai nempa kuing HWP nuju enggau chara ke betul kena nimbal utai ke nyadi din," ku iya madah maya sesi Town Hall Pemansang HWP ba Auditorium Sepital Besai Sarawak (HUS) malam, ensanus.
Ku Khairy, bungkur Internet mega beguna amat sereta nyadi tulang belakang HWP.
"Nya ukai semina besambung enggau digital tang mega bekaul enggau data.Aku amat beratka data ti senayau lalu aku mega pechaya ba alai pemansut data nya.
"Kitai mesti bisi data ke tegap awakka kitai ulih ngenipakka peminta enggau pemansut enggau enda betagang lalu ngengkahka nya ba siti endur ke diguna enggau lengkas.
"Tu mega deka mantu kitai nambahka pemansang negeri, ke udah tinggal. Aku setuju kitai patut nentuka semua orang mesti dulu nitihka ikas pemansang setipak enggau negeri bukai, lalu udah nya disebaka ba semua orang. Nya agenda besai ungkup Keretas Putih tu," ku iya.
Beratka pasal randau sentang sekeda bansa penyakit ti dibantaika maya sesi town hall, Khairy madahka HWP enda berandauka silik pasal sesebengkah penyakit.
"Nadai bab pasal sesebengkah penyakit. Tu bekaul enggau sistem kereja kena nentuka kitai ulih ngemunaska sesebengkah penyakit.
"Bakani kitai ngaga sistem tu iya nya nengah Keretas Putih, ti ukai aja ulih ngemunaska penyakit, tang nentuka nya ulih dipunaska enggau lengkas, kelebih agi ba komuniti menua pesisir ti suah amat kena.
"Nya alai sesi tu ukai semina berati penyakit aja, tang timbal kena nentuka semua penyakit dulih diputarka enggau chara ke ngasi sereta ba maya ke betul," ku iya.
Khairy mega nyemetak madahka HWP mesti beratika spektrum nyaga pengerai berengkah ari nagang, promotif, ngeraika enggau rehabilitatif ngagai pengawa nyaga paliatif.
Kelimpah ari nya ku iya, beratika chara berubat tradisional China ti tau nyadi sebagi ari HWP.
Ku iya, ikas pemujur Keretas Putih tu iya nya bakani nyaga enggau ngeraga sida ti diau jauh ari mengeri.
"Nyema sida ti diau jauh ari mengeri ulih ngasaika b ungkur pengerai global sereta nyaga pengerai betikas dunya, HWP tu deka mujur nempa siti sistem ke tau dikemegahka kitai. Nya nyengkaum orang ti diau di Malaysia," ku iya.
HWP ngembuan juluk deka nentuka pengamat sistem nyaga pengerai jemah ila nengah chara meri fokus ngagai sekeda bidang bidang, lalu Khairy deka bejuraika pekara nya di Parlimen dalam bulan November taun tu.