MIRI: Perintah Besai dikearap ulih nambahka agih belanja ke lebih besai ngagai Sarawak lebuh ti bejuraika Bajet 2023 bulan baru, kena ngangkatka servis utiliti kelebih agi ba kandang menua pesisir.
Sapit Menteri Utiliti enggau Telekomunikasiyen (Utiliti), Datuk Dr Abdul Rahman Junaidi madahka Sarawak agi begunaka belanja ke mayuh dikena nentuka perengkaguna utiliti ditambah manah sereta mungkur semua.
"Belanja besai sereta chukup diguna kena Sarawak ngangkatka kualiti idup rayat nyengkaum ngaga projek besai baka bekal ai enggau elekterik di menua pesisir.
"Nyadi negeri ke besai, kami mega napi pemar besai ba pengawa neri servis utiliti kelebih agi ba bekal ai ti mungkur semua enti dibandingka enggau sekeda negeri bukai," ku iya madah maya aum media pengudah ngulu pengawa meri penerang sereta nemuai seraya kereja ngagai Projek Bekal Ai Bagi Menua Miri ditu, kemari.
Ku iya, kena ngaga semua projek ke meri empas besai nya, Sarawak amat begunaka belanja ke besai nengah Bajet 2023 ti deka dibantaika Menteri Besai Datuk Seri Ismail Sabri Yaakob, dalam bulan Oktober tu ila.
Ngenang pasal penemuai kereja nya, Dr Abdul Rahman madahka urung 35 Projek Bekal Ai ke meri empas besai ke beungkus urung RM887 juta, diatu benung digaga dikena nambah manah infrastruktur enggau sistem bekal ai di Miri.
"Projek nya sebagi ari Sistem Grid Bekal Ai Sarawak ti ke datai ari buah penemu Premier Sarawak dikena mutarka isu bekal ai sechara efektif sereta mungkur semua," ku iya.
Ku iya, semua projek diperambu silik Perintah Sarawak nengah Opis Menteri Utiliti enggau Telekomunikasyen sereta Opis Bekal Ai Menua Pesisir (JBALB) Sarawak ke nyadi ejensi ngaga ny, lalu perintah besai nengah Opis Menteri Pemansang Menua Pesisir (KPLB) kena mantupka peminta bekal ai ti majak nambah ditu.
"Naka ke diatu, 17 projek bekal nya dipelanja Perintah Sarawak enggau perintah besai beungkus urung RM201 juta tembu digaga sereta mujur mutarka sekeda isu bekal ai ba sekeda kandang menua di Miri.
"Lalu 13 iti agi agi projek ke beungkus urung RM483 juta benung digaga sereta mandangka pemujur ti amat positif," ku iya.
Ku Dr Abdul Rahman, bisi lima iti agi projek ke beungkus urung RM202 juta mengkang ba renggat diperambu.
"Pemujur semua 13 iti projek ke benung digaga nya mandangka prestasi kereja ti amat manah taja pan maya ke ngaga nya sebedau tu betapi enggau pemar berindik ari pandemik COVID-19," ku iya.
JBALB Sarawak, KPLB enggau kunteriktor projek udah bejalaika pengawa enggau manah kena nentuka projek bekal ai nya tetap dipejalai sereta tembu digaga ba maya ke ditetapka.
"Kena nyamin kualiti bekal ai ti manah agi sereta bisi belama di Miri, JBALB Sarawak deka nentuka projek nya ti benung digaga diatu, ulih ditembuka dalam timpuh ti ditetapka," ku iya.
Sama bisi maya nya, Kaban Kunsil Negeri Telang Usan Dennis Ngau,Direktor JBALB Sarawak Chang Kuet Shian, Menijar Kandang Menua Utara JBALB Tie Tung Ing enggau Sapit Residen Bagi Menua Miri, Juan Ubit.