KUCHING: Perintah negeri meransang kompeni telekomunikasyen tauka Telco ngambi peluang ngena perengkaguna menara ke digaga dikena nentuka kelebih agi kandang menua pesisir nerima bungkur internet baka ke ditagit.
Menteri Utiliti enggau Telekomunikasiyen Datuk Julaihi Narawi madah, nya setipak enggau juluk perintah negeri ambika serata Sarawak bisi bungkur internet manggai ba taun 2030.
"Nya alai, kami nganggarka mesti nirika urung 7,000 iti menara telco di serata Sarawak lali diatu kitai udah nirika nyauka 3,500 iti di serata Sarawak lalu 1,043 iti agi benung didirika.
"Kami beratika kena nyapai 7,000 iti nya endang begunaka timpuh, tang ke pemadu beguna enti menara kitai tembu didirika, kami minta semua kompeni penyendia telekomunikasyen ngena peluang sereta ngena menara ti udah didirika di serata Sarawak ambika bungkur internet bisi sereta ulih dikena di serata Sarawak," ku iya.
Iya bejaku munyi nya maya aum media pengudah bejadika IRIX Batam Internet Cable System (BaSICS) enggau TIER IV Data Centre ba Palan Konvensyen Borneo Kuching (BCCK) ditu, kemari.
Ku Julaihi baru, ari baruh perintah negeri nengah Opis Multimedia Sarawak (SMA), 600 iti menara deka didirika ti dibagika ngagai dua fasa, ike sama 300 iti menara tetiap fasa.
Ku iya, fasa keterubah mungkur 300 iti menara ti benung didirika lalu diatu benung ngelekatka perengka telekomunikasyen ti dipejalaika Perbadanan Ekonomi Digital Sarawak (SDEC).
"Ba fasa keterubah diatu SDEC benung ngelekatka semua perengka telekomunikasyen di semua menara ke benung didirika laban sebedau tu, fasa tu enda dilekatka perengka telekomunikasyen tang ba fasa kedua ila, perengka nya deka terus dilekatka sereta.
"Juluk ati kitai ambika kompeni penyendia telco baka Celcom, Maxis, Digi tauka U-Mobile ngena menara nya. Diatu penyendia telco fokus agi ngagai kandang mengeri, uka menua pesisir ti ngujungka kandang menua pesisir Sarawak kurang bulih pemaik ari nya.
"Enggau tu kami bebendar meransang sida nyingkang jauh agi tauka ngerembaika agi servis sida ke menua pesisir laban kami udah nirika mayuh menara ambika kandang menua pesisir Sarawak bisi bungkur internet," ku iya madah n yemetak.
Ku Julaihi baru,perintah negeri udah melanja RM2 bilion uambika bisi bungkur internet magang di Sarawak kelimpah ari perintah besai nengah Opis Komunikasyen Multimedia Malaysia (SKMM) ti udah ngemendarka RM4 bilion kena ngemudahka pengawa niri enggau ngelekatka perengka telekomunikasyen di serata negeri.
Ku iya, nya alai perintah negeri amat ngelaluka kompeni telekomunikasyen ti bepangkalan di Kuching iya nya Irix nyendiaka perengkaguna infrastruktur telekomunikasyen.
"Nya meri peluang ngagai kompeni tauka pengemeran industri dalam telco di Sarawak ngena infrastruktur ti disediaka Irix dikena nyambung Sarawak enggau dunya luar," ku iya.
Iya arap amat ati, enggau pemisi kompeni baka Irix, nya ulih nyaup perintah negeri nyapai juluk nyadi negeri bepenatai pemisi besai manggai ba taun 2030.