MIRI: Gerempung Ukai Dikuasa Perintah,Serakup Pemikir Dayak Sarawak (DTTAS) ngarapka ulih nyendiaka platform pelajar bepelasarka pengelandik ngagai bala anak ti udah ngambi peresa SPM enggau STPM, nengah pengawa mandangka pekara pelajar.
DTTAS nengah penerang berita ti dipansutka chairman pengatur Pengawa Mandangka Pekara Pelajar DTTAS 2022 ensana, Wellie Henry Majang enggau sekretari pengatur, Malvina Albert Klinsing madahka sistem peelajar menua kemaya hari tu betapi enggau pemar ti besai lalu begunaka siti penyungkak paradigma kena nentuka nya terus relevan.
"Pemansang teknologi enggau revolusyen digital beratika ubah ngenyit ba rampa global. Tu begunaka kolaboratif ari semua kena nentuka sistem pelajar menua sama sinkang enggau pemansang teknologi," ku Wellie madah nengah penerang ti dipansutka seduai ditu, ensana.
"Kelimpah ari nya, kena ngemujurka agenda pelajar, menua enda patut ngelempaika nya ba pengajar aja, tang apai indai mega patut mantu bala anak ti kurang nyulut dalam akademik nampung pelajar sida nengah chara belajar bepelasarka pengelandik ti bisi pinta ba makit kereja," pia ku penerang nya.
DTTAS mega madah, ari sukut agih penatai pemisi, rayat kemaya hari tu, meda bala anak ari raban orang ke bepenatai pemisi besai mujur agi dalam pelajar.
Lebuah pia, sida ulih nampung pelajar ngagai sekula mar agi enggau ke pemadu manah sereta bisi servis ngembing sida kediri tauka tuisyen pengudah tembu jam belajar.
"Taja pia, sida ke bepenatai pemisi mit enggau jelan pemesai, enda ulih nitihka singkang sida nya.
"Sida semina ulih besekula ba sekula perintah lalu nitihka sistem pelajar nasional. Nya alai kitai begunaka sistem pelajar ti manah ungkup semua,lalu ukai semina sekula ke dipilih aja," pia ku penerang nya.
"Kami deka meri pelajar ke pemadu manah ba orang ke kaya tauka seranta, enda ngira di pelilih menua tauka mengeri.Tu mih strategi kami kena ngemujurka ‘inclusive development’.
"Tuju DTTAS Education Fair 2022 iya nya meri peluang ngagai nembiak enggau nembiak sekula di menua pesisir ngulihka penerang pasal pelajar, latih enggau bantu pelajar," ku DTTAS.
Nya alai, nengah chara ngiri penemu nengah program tu, nembiak ti udah ngambi peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM),ti enda mujur dalam akademik deka bisi peluang milih kus tauka bidang pelajar ti engkeman enggau setipikit sereta minat sida.
Malvina nengah penerang nya madah, program tu digaga khas kena meri penerang pasal peluang pelajar, latih enggau bantu pelajar ngagai bala nembiak enggau nembiak sekula di serata Sarawak kelebih agi ti udah ngambi peresa SPM enggau STPM.
Siri kedua DTTAS Education Fair 2022 deka diatur kena 16hb-17hb September 2022, berengkah ari pukul 9.00 pagi naka pukul 5.00 lemai ba Dewan Komuniti Sibu Jaya, Sibu.
Nya alai, graduan patut nyikap diri enggau bemacham pengelandik ambika sida ulih besemekih ba makit kereja ti amat kompetatif.
Sida mega patut nemu pemujur dalam kademik aja enda ulih nyamin sida bulih peangku pengawa setipak enggau setipikit ke diulih sida, pia ku penerang nya.
"Sukung ari semua endang pelasar kena nyapai penyulut enggau pemujur dalam pelajar bala anak kena n yamin ngembuan pengidup ke tegap jemah ila, lalu ditangkanka enggau ngadaka mayuh agi raban intelektual enggau professional jemah ila.
"Semina pelajar aja ulih ngubah pengidup sesiku nyadi bisi agi reti sereta ulih ngemujurka juluk ati ungkup jemah ila. Enti sida mujur nampung pelajar ngagai renggat ke tinggi agi, ari ruang bilik ti seranta sereta besekula di menua pesisir ulih ngubah gaya ekonomi ruang bilik sida," pia ku penerang ari seduai nya.