KUCHING: Pakatan Harapan (PH) Sarawak meri kuasa ngagai parti berunding enggau parti ukai Gabungan Parti Sarawak (GPS), nyema bisi sama deka nganjung chalun ba sesebengkah parlimen maya pengawa bepilih besai ke-15 (PRU15) ke deka datai.
Chairman PH Sarawak, Chong Cheing Jen madahka chara nya deka ulih nempa tauka numbuhka gerempung/kunsi pengawa bepilih (electoral pact) kena ngelaban GPS kelimpah ari ulih ngemuntangka pengawa berunding bekaul enggau ungkup sitak.
PH Sarawak nyengkaum Parti Tindakan Demokratik (DAP), Parti Keadilan Rakyat (PKR) enggau Parti Amanah Negara (AMANAH).
"Kami (PH) udah ngadu tauka ngatur ungkup sitak (parlimen) ke diarika entara tiga parti kami (DAP, PKR, AMANAH). Asal iya, kami agi nitihka sitak ke diungkup maya pengawa bepilih 2018 suba laban nya tusun tauka atur menang (winning arrangement). Kami deka ngetanka status quo.
"Taja pia kami tebuka iya nya ulih berunding enggau parti ukai GPS (bekaul enggau ungkup sitak). Parti nya empu (dalam PH) deka berunding terus enggau parti ukai GPS bekaul enggau ungkup sitak awakka bisi serakup/gerempung pengawa bepilih(electoral pact).
"Sida (parti dalam PH) diberi kuasa berunding pekara tu, enda ibuh pulai lalu berunding enggau PH. Kami meri mayuh atur tendu ngagai parti nya ke diri empu berunding," ku iya ti mega Chairman DAP Sarawak.
Chong ti disempulang dua iku sapit iya, Roland Engan ( ti mega chairman PKR Sarawak) enggau Abang Abdul Halil Abang Nail (ti mega chairman AMANAH Sarawak), ngenang pekara tu ba aum pengarang berita PH Sarawak ke diatur ba Indu Opis DAP ditu, kemari.
"Taja pia, sitak ke enda ulih diperundingka iya nya sitak penyandang laban udah bisi pengelebih ke diri empu," ku Chong ke mega kaban Parlimen Stampin.
Maya PRU14 ke diatur taun 2018, PH Sarawak bediri minta pilih ba 30 ari 31 sitak Parlimen ti dipelabanka di Sarawak iya nya PKR ba 15 sitak, DAP ba sembilan enggau Amanah ba enam sitak Parlimen.
PH Sarawak maya PRU14 enda bediri minta pilih ba Parlimen Julau berindik ari parlimen nya kubu tegap Barisan Nasional, seraya mega meri awak ngagai chalun Bebas Larry Sgn ngelaban chalun BN Datuk Joseph Salang Gandum.
Nambah nya Chong ditanya bekaul enggau chalun PH Sarawak ba PRU15, iya madahka, pekara nya diputuska parti nya empu nentuka bagi chalun laban PH negeri semina ngatur strategi ungkup pengawa bepilih ke deka datai tu.
"Nya alai pemayuh sitak ti dipelabanka PH Sarawak bepanggai ngagai pemutus pekara ti dikerunding enggau parti bukai ke ukai GPS," ku iya.
Kelimpah ari nya ditanya isu deka dibai maya PRU15, Chong madahka entara isu nyengkaum bekaul enggau makai suap, pengawa ngatur ti manah (good governance), enggau hak Sarawak.
"Nama ke pemadu beguna aram kitai sama nembuka pekara ke bedau tembu, bejalaika reformasi menua.
"Isu makai suap pekara dikemeratka kami. (Laban) kitai nadai ulih ngenggaika makai suap tu mai pengerugi, ambika chunto projek solar ba 369 buah sekula menua pesisir Sarawak," ku iya.
Bekaul enggau Komiti PH Sarawak 2022 - 2023 iya nya betuai ka Chong (Chairman) sereta sapit iya Roland enggau Abang Abdul, lalu Sekretari iya nya Alam Ling sereta Tukang Wang Diog Dios.
Gushi Ardanisah dipilih nyadi Ketuai Raban Nembiak enggau Violet Yong nyadi Ketuai Raban Orang Indu.
Kaban Komiti iya nya nyengkaum Abun Sui Anyit, Japar Suyut, Ibil Jaya, Dr. Kelvin Yoo, Chiew Chiu Sing, Alice Lau, Maxwell Rojis, Mohd Zen Peli enggau Lahaji Lahiya.