KUCHING: Opis Menteri Pemansang Orang Indu, Nembiak Mit enggau Pengelantang Pendiau Raban Bansa (KPWK) Sarawak komited nikika penyampau ngagai 100 peratus nembiak mit di Sarawak bulih pelajar tumu.
Menteri KPWK, Dato Sri Fatimah Abdullah madah laban bepelasarka sekeda pansik ngayanka pemesai guna pelajar tumu enggau nyaga nembiak mit iya nya pemadu efektif kena ngangkatka pengulih akademik nembiak mit enggau pemansang modal mensia ke lebih agi raban ari ruang bilik kurang penatai pemisi (B40).
"Kitai pechaya nengah pelajar tumu enggau nyaga nembiak mit ti bekualiti patut iya berengkah ari renggat tumu nembiak mit, kitai ulih mantu raban kurang penatai pemisi tu pansut ari pusin penyeranta sereta ngangkatka tikas pengidup sida.
"Taja pan nadai polisi ti madah enda tau enda bisi pelajar prasekula, opis menteri kami seruran bekerejasma enggau mayuh ejensi baka Opis Pelajar Sarawak, KEMAS, PERPADUAN enggau mega egensi ECCE ke dikeempu perintah Sarawak, SeDididk kena nentuka pelajara tumu nembiak mit ulih diakses bala anak kitai di Sarawak.
"Enggau pengeran ti nadai tatak ari opis menteri, Sarawak mujur tejapaika 98.35 peratus nembiak Tahun 1 (taun tu) udah tembu pelajar prasekula sida. Kami komited nikika peratus tu nyentuk nyapai 100 peratus," ku iya.
Fatimah madahka pekara tu ba aum pengarang berita nyerumba atur pengawa 'Serah Tugas Pemangku Pengurus Besar Kepada Pengurus Besar SEDIDIK Baru' ke diatur ba Bilik Melur KPWK ditu kemari.
Dulu ari nya iya madahka perintah negeri chakah nambahka akses nembiak mit tu ngagau pelajar tumu nembiak mit, sereta kenyau ari perintah negeri ngambi SeDidik kena 22 Julai 2020, opis menteri mujur ngerembaika akses pemansang tumu nembiak mit enggau chara nambahka tiga Tadika enggau 2 Taska.
Enggau penambah nya (Tadika enggau Taska), ngujungka penyampau semua Institusyen Pelajar Tumu Nembiak Mit (IPAKK) SeDidik nyadi 98 buah ba taun 2022, ku iya.
Nitihku iya, nya nyengkaum TADIKA SeDidik PPR Bandaria Park, Bintulu, TADIKA SeDidik Lawas, enggau TADIKA SeDidik Semariang Batu ti ditumbuh bepelasarka peminta ti nambah enggau peminta komuniti endur nya.
Lalu dua Taska nya nyengkaum TASKA endur Kereja UNIMAS enggau TASKA Endur Kereja Kompleks Kesejahteraan Komuniti Dalat ti ditumbuh ken meri servis sukung ngagai apai indai ti gawa ke lebih agi sida ke begunaka servis nyaga anak semak enggau endur gawa, ku iya.
"Enggau penambah akses, enggau peminta komuniti ba endur tu, nya ngayanka SeDidik terus dipechaya raban bansa. Nya alai mega, kitai patut seruran ngangkatka kualiti servis, perengka guna enggau kualiti pengajar SeDidik," ku iya.
Sama bisi ba aum pengarang berita tu kemari Sapit Menteri Pemansang Orang Indu, Nembiak Mit, enggau Pengelantang Pediau Raban Bansa Datuk Rosey Yunus sereta sida ke bukai.