KUCHING: Bisi urung 1,040,212 hektar (2.57 juta ikar) selampur bagi menua negeri Sarawak udah disukat kelingi nengah Program Nyukat Tanah NCR Inisiatif Baru, naka 31 Julai 2022.
Sapit Premier, Datuk Amar Awang Tengah Ali Hasan madahka, Program Nyukat Tanah NCR Inisiatif Baru ke dipejalaika berengkah taun 2010 ke dipejalaika dua renggat iya nya keterubah nyukat perimeter sereta digazet ari baruh Seksyen 6 Kanun Tanah Negeri(KTN) nyadi Rizab Komunal Bumiputera (Betanam Betupi), enggau, kedua, nyukat ngena chara lot individu sereta ngeluarka surat pala tanah ari baruh Seksyen 18 KTN deka dipejalaika.
Iya madahka pengawa ngukat tanah NCR renggat keterubah siti chara nyukat ti bisi empas enggau jampat, iya nya kandang endur tanah NCR ti besai ulih disukat enggau jampat kena nentuka garis entara tanah NCR ti terang sereta direjista dalam rejista tanah enggau Gazet Rizab Komunal Bumiputera ari baruh seksyen 6 KTN dikeluarka.
"Bukti iya ari taun 2010 nyentuk 31 Julai 2022, Opis Tanah enggau Survei (JTS) Sarawak udah mujur nyukat sechara perimeter spemesai urung 1,040,212 hektar (2.57 juta ikar) selampur bagi mena negeri Sarawak.
"Ari penyampau nya, sepemesai 800,176 hekatr tauka 1.97 juta ikar udah digazet. Uji berunding pemadu besai ke disukat nengah Program Nyukat Tanah NCR Inisiatif Baru.
"Sehari tu (kemari) bisi emapt kandang endur deka nerima Gazet Rizab Komunal Bumiputera ari baruh Seksyen 6 KTN iya nya Kampung Murud Plaman, Serian; Kampung Sumpas, Serian; Kampung Reban & Lubok Ria, Serian, enggau Kampung Paon Rimu, Serian," ku iya.
Iya ti mega Menteri Pengeraja Asal enggau Pemansang Mengeri II nyebut pikara tu ba Pengerami Nyuaka Gazet Rizab Komunal Bumiputera ari baruk Seksyen 6 KTN, Surat Pala Tanah Seksyen 18 KTN enggau Lisin Pendudukan Sementara (TOL) Bagi menua Serian ke diatur ba Dewan Tayung Langui, Kampung Pichin, di Serian, kemari.
Bejaku baru, ku iya, pengudah Gazet Rizab Komunal Bumiputera ari baruh Seksyen 6 KTN, udah tu ditangkan renggat kedua iya nya nyukat lot individu bepelasarka peminta ti dikemendarka, kandang endur nya udah disukat ngena chara perimeter, digazet ari baruh Seksyen 6 KTN enggau kesediaan penuntut tanah NCR nya.
Ku iya kena nentuka pengawa nyukat lot individu ulih dipejalaika enggau lanchar, pengempu tanah NCR patut meri kerejasama ngagai JTS Sarawak, ngelala bagi garis tauka entara tanah ngena chara ngaga rintis ti terang, nadai berebut tauka belayaka garis tauka entara, enggau datai maya nyukat dipejalaika.
"Kerejasama ketua kaum, ketuai raban bansa enggau pengempu tanah NCR amat beguna dalam program nyukat tanah NCR. enti nadai kerejasama ngujungka program nyukat tanah laun dipejalai enggau surat pala tanah laun diterima.
"Naka 31 Julai 2022, bisi 55,160 lot individu udah mujur disukat ti mungkur kandang endur sepemesai 68,998 hektar (170,498 ikar) ti ngeluarka surat pala tanah ari baruh Seksyen 18 KTN.
"Tu nyengkaum sepenyampau 889 surat pala tanah Seksyen 18 KTN ti deka diberi ngagai 699 penerima ba kandang endur Kampung Pichin, Serian; Kampung Engkeroh, Serian; Kampung Petag, Padawan; Kampung Beradau, Siburan, enggau Kampung Tubih, Serian," ku iya.
Sama bisi datai ba pengerami tu, Sapit Menteri Pengeraja Asal enggau Pemansang Mengeri II Datu Len Talif Salleh enggau sida ke bukai.