KUCHING: Pemansang dagang temuai di Sarawak deka terus dipejalaika enggau chara bisi tanggungpengawa sereta tegap, ku Premier Datuk Patinggi Tan Sri Abang Johari Tun Openg.
Iya bebendar madahka Strategi Pemansang Pengudah COVID-19 (PCDS) perintah negeri 2030 "Lebuh manggai taun ba taun 2030, Sarawak deka nyadi palan penemuai besai ungkup eko-dagang temuai enggau program pengawa dagang ba rantau Asean.
Ku iya, nya deka disukung komuniti ke diberi kuasa nyaga tauka ngintu pengeraja asal, budaya enggau biodiversiti sereta meransang pemeranak puku enggau pemansang nengah ulah ti bisi tanggung pengawa.
"Sektor dagang temuai udah dikelala nyadi siti ari pugu ekonomi ti pemadu beguna dalam PCDS 2030 kami.
"Sarawak nuju ngagai dagang temuai ti bisi tanggungpengawa sereta tegap, lalu baka ke dipeda kita, ICRTH2022 iya nya siti chara nyingkang ke mua ti beguna amat ngagai perintah kitai enggau raban orang ke bisi pemerat ba dagang temuai di Sarawak ngamatka batang tuju dagang temuai ti bisi tanggungpengawa," ku iya.
Iya madahka pekara nya nengah teks jaku iya ti dibacha Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah nyerumba bejadi 'Persidangan Antarabangsa mengenai Pelancongan dan Hospitaliti Bertanggungjawab (ICRTH)2022' ditu, kemari.
Ngena rambai jaku "Menggerakkan Pelancongan Bertanggungjawab dalam Tindakan: Ke Arah Kemakmuran Ekonomi, Inklusiviti Sosiobudaya dan Kemampanan Persekitaran", batang tuju aum besai tu dikena ngemajuka penemu enggau chara dagang temuai ti bisi tanggungpengawa ungkup pemansang ti tegap.
Abang Johari madah, udah datai ba timpuh iya semua orang ke bisi pemerat ba dagang temuai mesti bekerejasama sereta ngena pelasar baka aum besai, dikena ngangkatka industri dagang temuai ke menua enggau ke atas ungkup jemah ila ke tegap.
Bejaku baru, aum besai nya mega ngayanka pengeran Sarawak masuk komuniti dagang temuai dunya kena nyukung Juluk Pemansang Ke Tegap (SDG) dalam konteks menua tu.
Ngenang pasal aum besai ICRTH ke diatur nya, iya madahka nya program ti ngempuruka raban orang ke bisi pemerat ba dagang temuai enggau hospitaliti ambika bekunsi penemu enggau jalai pemansut, sereta nempa kaul enggau kerejasama.