KUCHING: Sarawak deka ngaga dua buah agi palankonvensyen di mengeri besai tu enggau di Miri,pia ku Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah.
Ku iya, palan konvensyen di mengeri tu deka digaga ba sepiak Palan Konvensyen Borneo Kuching (BCCK) lalu endur palan konvensyen baru di Miri bedau ditentuka agi.
"Pelin kepenudi endar bekaul enggau langkar deka ditemu pengudah di kemendarka Perintah Sarawak," ku iya madah maya aum media ngatur Kuching Marathon 2022 ditu, kemari
Ku Abdul Karim, palan konvensyen di mengeri tu engka deka ngembuan saiz dua kali lipat besai agi enti dibandingka enggau BCCK.
"Meda ba pengawa konvensyen ti diatur ba BCCK, (kami beratika BCCK) udah enda muat nangkup sekeda program ke lebih besai ti deka diatur kami dia.
"Enti ulih, kami dekaka pengawa ngaga (palan konvensyen baru di Kuching) digaga tembu dalam timpuh 24 bulan," ku iya.
Ngenang pasal Kuching Marathon 2022, Abdul Karim madahka pekit nya deka berengkah lalu tembu ba Padang Merdeka di mengeri besai tu ti mungkur sepenyauh 42 kilometer (km), 21km, 10km enggau 5km lalu pesereta deka dilekaka tumu, iya nya pukul 1 pagi kena 2 Oktober tu ila.
"Penyampau orang ke deka belanda ti udah ngerejista diri naka ke diatu bisi 8,906 iku lalu ari penyampau tu, 5,811 iku nya ari Sarawak, 3,095 orang ari luar Sarawak nyengkaum peranak menua bukai," ku iya.
Ku iya ungkup peranak menua bukai, semua nya bisi 639 iku lalu 290 ari Indonesia, Brunei (162), Singapura (105), United Kingdom (12), Kenya (7) enggau Jepun (6).
Ku iya, pengatur pekit nya udah dipinta ngelanjarka timpuh ngerejista pesereta abis nadai seminggu nyentuk ke dua minggu, laban haribulan tutup iya nya semina naka 31 Julai tu tadi.