KUCHING: Kenyau 1 Januari 2020 ngagai 29 Julai 2022, bisi 225,492 iku orang ke beumur 60 taun udah ngembuan Kenyalang Gold Card (KGC).
Menteri Pemansang Orang Indu, Nembiak Mit enggau Pengelantang Pendiau Raban Bansa,Dato Sri Fatimah Abdullah madah, taja pia siti isu ke suah dikenataika sekalika nengah media rama, iya nya bekaul enggau kad KGC sida.
Nitihku iya, bisi sekeda ti bedau nerima kad KGC nya dipelaba ketegal address enggau lumur telefon ke udah berubah.
"Ke penerang, agi mayuh kelebih agi ba bagi menua Kuching ditu, kad KGC sida enda diambi. Kami mega deka madah ngagai sida ke udah minta kad KGC tang bedau nerima, tau nanya ngagai tim KGC tu sekalika kad nya udah tembu, dini endur sereta dini alai ulih ngambi.
"Tim KGC deka minta penerang silik baka lumur kad pengelala (IC) enggau address peminta dalam IC, laban kad KGC tu dianjung nitihka address dalam IC lalu kekadang address dalam IC nya address lama sereta udah berubah,” ku iya.
Fatimah madahka pekara tu maya aum pengarang berita bekaul enggau Kad KGC ke diatur ba opis iya di Begunan Baitul Makmur II ditu, kemari. Sama bisi maya aum pengarang berita nya, Direktor JKM Noriah Ahmad enggau sida ke bukai.
"Tim KGC mega napi penanggul deka betelefon ngagai pengempu kad KCG laban lumur telefon ke ditulis dalam pom peminta nya bisi ke udah berubah, lebuh ditelefon enda ulih.
"Taja pia kami dekaka isu tu diputarka. Nya alai peminta tauka pengempu kad KCG tau betanya tauka betelefon ngagai 017-8040960 enggau nengah emel *[email protected]," ku iya.
Fatimah, berebak enggau tu nandu baru bekaul enggau pengelebih ngembuan kad KGC iya nya nyengkaum deka diberi diskaun/rebat tauka yuran enda bebayar ungkup barang enggau servis ti disediaka ejensi perintah, peribit enggau palan komersial ke nyadi kaban strategik KGC.
Entara nya dalam bidang pengerai, perengka pengangkut mensia mayuh, barang ke diguna ninting hari, enggau ke bukai.
Ku iya, bisi 383 kompeni peribit enggau palan komersial udah berejista nyai kaban strategik KGC. Penyampau tu deka nambah lalu JKM deka ngelala bagi kompeni, peribit, opis tauka ejensi ke nyadi kaban strategik.
KGC mega disikap ngena Bantu Pengasih Pemati (BIK) ku iya, pemeri BIK ngagai pemegai KGC ke udah nadai iya nya inisiatif perintah Sarawak kena mantu ngelempungka ungkus ngubur, lalu tetiap iku pemegai KGC deka diberi BIK RM3,000 siku.
"BIK mega tebuka ngagai mensia mayuh ke nadai penatai pemisi enggau nadai nerima sebarang bantu pengelantang pendiau pemati ari barang opis kelimpah ari Penerima Pinchin Opis Pengereja Pengawa Perintah enggau Opis Pekara Veteran Soldadu.
"BIK deka dibayar nitihka prosedur operasyen standard (SOP) ke udah ditetapka. Peminta BIK patut dikenatai dalam timpuh 120 hari tauka 4 bulan pengudah pemegai KCG udah nadai.
"Nyentuk ke diatu, Opis Pengintu Pengelantang Pendiau Raban Bansa (JKM) udah melanjaka RM27,378,000 ngagai 9,126 aris pemegai KGC ke patut. Tu nyengkaum dalam bulan Mac 2020 bisi 1,773 peminta (BIK) dikemendarka ti sepenyampau RM5,319,000 udah dipelanja, lalu ba taun 2021 nyentuk 29 Julai 2022, bisi 7,353 peminta dikemendarka ti sepenyampau RM22,059,000,” ku iya.