KUCHING: Perintah negeri seruran beratka program pemansang nembiak nengah chara mantu ngerembaika pengelandik sida dalam mayuh bengkah bidang nyengkaum seni, muzik enggau industri kreatif.
Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah madah, program pemasang tu ukai semina ngangkatka agi tikas pengelandik nembiak tang ulih nempa ulah positif ba sida.
"Raban tu nyadi ejen besai ti patut diansah ambika ulih mai ubah enggau pemansang ngagai raban bansa.
"Nya kebuah, program pemansang ke diatur nya ulih ngenegapka runding raban biak,nambahka penyikar sosial, emosi, kognitif enggau ulah sida.
"Nya benugana amat kena nentuka kitai nempa ketuai ungkup jemah ila ti manah ke komuniti enggau menua kitai," ku iya.
Iya bejaku munyi nya maya Kuching's Got Talent Grand Final 2022 ba Panggau Besai Majlis Bandaraya Kuching Selatan (MBKS) ditu, malam ensana.
Ku Abdul Karim,pengawa ti dipejalaika MBKS kena ngelakuka seni pemerindang kreatif dba rebak biak nengah program mandangka pengelandik nya endang ba jalai ke betul.
Kelimpah ulih ngansah potensial rebak biak ku iya, nya mega meri peluang ngagai sida mantaika pengelandik sida.
"Tetiap disiplin seni pemerindang sekalika muzik, tarnda tauka ekspresyen bukai ke bekaul enggau kognitif, tubuh enggau emosi sesiku, ulih nambahka pengarap ati sida.
"Nya kebuah, perintah ngemansangka sebuah palan seni di Petra Jaya lalu enti nya udah tembu digaga, nya tau dikena semua mensia mayuh ti ngembuan pengelandik alai maantaika pengelandik sida," ku iya.
Ba pengerami nya Abdul Karim nyuaka perais ngagai champian ungkup kategori belagu umur 13 taun ke atas, Nur Ain Nadzirah Ahmad Safrie, kategori belagu umur taun ke baruh 12 Ashley Yong, kategori betanda beraban 5 Of Us enggau kategori pengelandik ke bukai, Kuching Chung Hua Middle School No.3 ti mantaika festival dram.
Abdul Karim mega bisi yuaka Anugerah Pengaga ati Khas ngagai Hwong Yew Tuong, 81 taun, laban iya masuk pekit nya lalu mantaika pengelandik diberi nama "Magic Mathematic".