MIRI: Pengawa mandangka pekara pelajar ti diatur Serakup Pemikir Dayak Sarawak (DTTAS) tauka DTTAS Education Fair ngepunka siri kedua di Sibu, dalam bulan September ke deka datai.
Pengawa mandang tu mega nyadi plaform ngagai bala nembiak ti udah nembuka pelajar di menua pesisir ngulihka pemasah pasal pelajar, latih enggau bantu pelajar ti diatur kena 16 enggau 17 September ba Dewan Komuniti Sibu Jaya, berengkah ari pukul 9 pagi nyentuk 5 lemai.
DTTAS Education Fair 2022 ke sekali tu nempa sejarah kediri empu laban bisi sukung enggau kerejasama ari raban rock popular Iban, Masterpiece ti setuju besaup ngemujurka pengawa pemandang nya.
Nengah penerang berita ensana, DTTAS madahka asil kerejasama strategik enggau Masterpiece nya sida tau regas nyingkang ngatur mayuh bengkah aktiviti enggau program ke ti tau ngemansangka raban bansa Dayak.
"Masterpiece sebengkah raban rock Iban ti pemadu mayuh peminat sereta beguna amat di Sarawak kelimpah udah diaku nengah sekeda Anugerah Muzik Sarawak.
"Nengah program nya, bala nembiak ti udah ngambi peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM) ti enda teulihka pemutus ti manah dalam akademik, bisi peluang milih kus tauka bidang bukai kelebih agi pengelandik ti setipak enggau pemutus peresa sereta minat sida," pia ku tu kang pengerembai berita Pemandang Pelajar DTTAS Siri II Sibu, Malvina Albert Klinsing.
Ku iya, DTTAS enggau Masterpiece nemu pekara tu, lalu ny a kebuah serakup enggau raban nya merambu ngembing sereta meri chara ke beguna amat ngagai raban nya.
"Kami dekaka sida disikap ngena penerang ke betul ti ulih mantu sida ambika enda salah pilih jalai, laban enti tu nyadi nay tau meri penanggul ngagai sida jemah ila," ku iya.
DTTASdekaka raban ke ditagit nya ngulu program ke diatur laban programnya kena ngembing sereta ngiring raban n embiak ngaga pemutus ke betul, sereta enda masau jam enggau duit ti ngujungka sida telengka peluang bulih kereja ti meruan agi.
Nengah program tu, DTTAS mega deka nyingkang regas ngena platform ti disediaka perintah ambika misyen enggau juluk ati DTTAS deka nempa nembiak ti manah ulih dikemujurka ba ikas ti pemadu maksimum.
Ku Malvina lebuh ke berandau, DTTAS enggau Masterpiece dekaka raban nembiak menua pesisir ngembuan penemu enggau pengelandik ti setipak enggau peminta kereja abad ke-21 tu.
Antara nya penyikar kognitif nyengkaum mayuh penemu dalam bidang ti dikinginka sida, penyikar mutarka penanggul enggau ngaga pemutus sereta ulih ngetanka ulah sida bekaul enggau sesebengkah kerejaya.
"Nya alai, enti sida ngembuan semua pengelandik ke diguna dnya deka meri tiga empas besai iya nya, keterubah iya ngembuan pengandal enggau arap amat kediri empu kena nyemelaka potensial diri, setipak enggau guna pengelandik entara pengaji enggau graduan lalu kualiti pelajar tinggi ulih diangkatka.
"Nya alai, graduan patut nyikap diri ngena mayuh bengkah pengelandik tambah ambika sida ulih besemekih ba makit kereja ti amat kompetitif," ku iya.
Naka ke diatu, program diatur DTTAS mega dipasuk Yahos School of Skills enggau Institut Latihan Perindustrian (ILP), Institut Kemahiran Belia Negara (IKBN), Pusat Pembangunan Kemahiran Sarawak (PPKS), Institut Kemahiran MARA (IKM), Unit Misi Akademik Universiti Teknologi MARA (UiTM) Sarawak, Curtin UniversitY Kampus Malaysia,Perbadanan Tabung Pembangunan Kemahiran enggau sekeda ejensi bukai.
DTTAS Education Fair nya siti siri tujah pelajar ti diatur ba siti maya belama, mindah ari siti pelilih menua ngagai siti pelilih menua.
"Pengudah Sibu, kami deka nampung siri tu ke pasar bukai di menua pesisir Sarawak lalu perambu tumu kami milih Kanowit nangkanka tu," ku iya.