KUCHING:Kaban Kunsil Negeri, Ba'Kelalan, Baru Bian ngenadaika jaku selebubu ti madahka iya deka ningkilka diri ari naydi kaban Parti Sarawak Bersatu (PSB) nitihka singkang ADUN Batu Lintang, See Chee How.
Baru enggau See dipeda baka 'diri menyadi' pengudah ke begulai dalam Parti Keadilan Rakyat (PKR), lalu seduai mega sama aktivitis hak asasi mensia lalu ari firma luyar ke sama.
The Borneo Post lebuh mantaika jaku Baru madahka "Aku agi enggau PSB."
Surat berita negeri jaku Inggeris nya mega madahka, See ngambi pemutus ninggalka PSB laban deka fokus agi ngagai Gerempung Ukai Dikuasa Perintah (NGO), ukai dipeda nyadi siku kaban politik penyakal ti beratka politik kediri empu aja.
"Iya deka negika hak rayat, ukai nyadi kaban politik tang nyadi NGO, " pia ku penerang ke datai ari orang ke semak enggau See.
See tmega madahka diri deka fokus ngagai sekeda aktiviti NGO ngagai komiti PSB pampang Batu Lintang.
Komiti PSB Pampang Batu Lintang betuaika See ke naydi chairman pampang nya.
Speaker DUN Tan Sri Datuk Amar Mohamad Asfia Awang Nasar maya aum media ba Kunsil Negeri (DUN) Sarawak ensana, madahka See ningkuilka diri nyadi kaban PSB berengkah ari tekala nya.
Ku Asfia, iya nerima surat See ningkilka diri nyadi kaban PSB kena 12 Ogos 2022 (Hari Lima).
"Nengah pemutus ningkilka diri nyadi kaban PSB, gaya penuduk parti-parti di DUN Sarawak iya nya GPS 76 kerusi, PSB (tiga kerusi), DAP (dua kerusi) lalu BEBAS (siti kerusi),” ku iya.
Ku Asfia, See ukai merejuk ke parti bukai tang semina ningkilka diri ari naydi kaban PSB, nya kebuah iya nyadi pengari Ngatika Diri.
Kena 30 Mac taun tu, Kaban Parlimen Sri Aman Datuk Masir Kujatningkilka diri ari PSB sereta nyadi kaban parlimen Ngatika Diri.
Taja pia, Masirmadahka diri meri sukung ngagai Menteri Besai, Datuk Seri Ismail Sabri Yaakob denggau perintah besai.
See sebedau tu nyadi kaban PKR, tang nyemilik PSB dalam bulan Mei 2020.
Iya kala gawa nyadi pemesai khas ex-Menteri Kereja Raya, Baru Bian lalu begulai enggau nyemilik PSB ti betuaika Datuk Seri Wong Soon Koh.
Ba Pengawa Bepilih Negeri ke-12, See mujur ngenanka kerusi DUN Batu Lintang pengudah teulihka 4,420 undi.